اسلام آباد(پاکستان نیوز پوائنٹ 3 نومبر2016ء) وزیر مملکت اطلاعات ، نشریات و قومی میراث مریم اورنگزیب پارینے کہ وزیراعظم محمد نواز شریف ہمیشہ وضع داری ، صبر و تحمل نا سیاست ءِ کرینے و ہندا دود ءِ مون آ دننگ ءِ، جمہوریت و پارلیمنٹ نا بالادستی ءِ قائم تخنگ کن المی ءِ کہ سیاسی دودوربیدہ ٹی وضع داری مرے، ساڑی آ حکومت نا موثر پالیسی تا سوب دہشت گردی نا جلہو آتیٹی 85درسد اسکان کمتی بس، پاک چین اقتصادی راہداری ڈٹ (سی پیک) نا کمک اٹ پاکستان اٹی معاشی شون و جہانی مالیاتی ادارہ غاتا کنڈآن پاکستان ءِ گچین اکانومی گوندنگ انگ ءِ ، میڈیا ملک انا شون و شرحالی کن چست کروک آ گام گیج آتے تالان کے، وزیراعظم محمد نواز شریف پانامالیکس نا معاملہ غا سپریم کورٹ ءِ کمیشن اس جوڑ کننگ کن چھٹی اس نوشتہ کریسس ولے ہمووخت اپوزیشن اسہ جاگہ اس ہم سلتوکہ بھلو وخت اس تدینگ انگ آن گڈ اینو معاملہ کمیشن آ سرمسنے، صحافی تارکھ اکن مفصل بل اس زوت پارلیمنٹ اٹی اتنگک۔
ساڑی آ جمہوری حکومت میڈیا آ ہچ وڑنا پابندی اسے نا تصور کپک، کوڈ آف کنڈکٹ نا بابت وزارت اطلاعات و نشریات بامقصد تربیت نا پلان اس ترتیب تننگ ءِ، صحافی تا رکھ انا بل ءِ اسمبلی ٹی اتنگ اُن، میڈیا تنظیمک دابل آ بغور جائزہ مطالعہ کیر و جاچ ءِ ہلیر اگہ وڑاسے نا ترمیم خوارہ تو تینا سلاہ ءِ ایتر ، قومی ، صوبائی و ضلع غاتا کہول آ پریس کلب آتا کڑد ءِ فعال جوڑ کینہ ، احتساب کن حکومتی بل غٹ پلو آتا احاطہ ءِ کیک، اپوزیشن نا احتساب بل اٹی صرف اسہ بندغ اسے ہدف جوڑ کننگانے۔
او پنچ شنبے آ پارلیمنٹ ہاؤس نا میڈیا گیلری ٹی پارلیمانی رپورٹرز ایسوسی ایشن (پی آر اے) و سینئر صحافی تتون ہیت وگپ کریکہ۔ مریم اورنگزیب پارلیمنٹ ہاؤس اٹی قائم پارلیمانی رپورٹرز ایسوسی ایشن نا دفتر نا ہم دورہ ءِ کرے۔ پی آر اے نا صدر صدیق ساجد آن بیدس ایلو عہدیدار و سینئر صحافی تا بھلو کچ اس داوخت آ ساڑی ئس۔ وزیر مملکت مریم اورنگزیب صحافی تتون ہیت وگپ کرسا پارے کہ ای وزیراعظم محمد نواز شریف نا منت واری ءِ ہرفیوہ ہراکنا لائخی تیا پت انا درشانی ءِ کرسا کنے وزارت اطلاعات و نشریات نا قلمبندان ءِ تسنے۔
اوپارے کہ میڈیا و پارلیمنٹرین تون اواری اٹ پارلیمنٹ نا بالادستی کن جہد ءِ برجاتخنہ۔ اوپارے کہ ساڑی آ حکومت اظہار رائے و میڈیا نا آجوئی آ یخین تخک، اوار ی اٹ قوائد و ضوابط جوڑ کروئی ءِ ،ہرانا مقصد پاکستان ءِ مون آ دروئی ءِ۔ اوپارے کہ وزیراعظم محمد نواز شریف پانامالیکس نا معاملہ غا سپریم کورٹ ءِ کمیشن اس جوڑ کننگ کن چھٹی اس نوشتہ کرے ہمووخت آ اپوزیشن اسہ جاگہ اس ہم سلتوکہ بھلو وخت اس تدیفنگ آن گڈ اینو معاملہ کمیشن آ سرمسنے۔
