اسلام آباد(پاکستان نیوز پوائنٹ 3 نومبر2016ء) وزیر داخلہ چوہدری نثارعلی خان پارینے کہ داسہ اسہ سلہہ بند اس ہم روڈآتیا برسا تینا رائے ءِ مسلط کننگ کپک، پولیس و ایف سی نا تعیناتی آ سیاست کننگپ، نن روڈ، اسکول ، ہسپتال ، کاروبار ءِ ملنگ کن او بند کننگ کن جنگ کریرہ۔ عمران خان جوان ءُ فیصلہ اس کرے، ملک اٹی انتشار آن دشمن تے فائدہ مریک، غٹ سپریم کورٹ نا فیصلہ نا انتظار ءِ کیر، دفاع پاکستان کونسل پیپلزپارٹی نا دور اٹی جوڑ مس، اوٹی کیہی جماعت آک ءُ، اودے انتظامیہ تینا شرط آتیا جلسہ کننگ نا موکل تس۔
پنچ شنبے آ داڑے پولیس لائنز اٹی اسلام آباد، پنجاب ، اے جے کے پولیس و ایف سی نا ورناتا دربارآن تران کرسا وزیر داخلہ پارے کہ ای اسلام آباد، راولپنڈی ومچ آ پاکستان نا شاری تا کنڈآن کانود نا عملداری قائم کننگ آ پولیس و کانود نافذ کروک آ ادارہ غاتا ورنا و افسر آتا منت واری ءِ اداکیوہ۔ اوافسر و ورناتون مخاطب مرسا پارے کہ نم قابل فخر اورے ، نمے مبارک مرے۔
اوپارے کہ دہ سال گڈ پاکستان نا پولیس ملک انا دھرتی آ کانود و آئین نا عملداری ءِ اڈ ترسا دنیا ءِ کلہو اس تسنے کہ داسہ سلہہ بند جتھا پیش تمسا نہ پولیس آ تینا رائے ءِ مسلط کننگ کیک نہ حکومت و نہ شار اسے آ ، دا بھاز بھلو عمل اسے ہرانا احساس ہر پاکستانی ءِ بایدے مرے۔ اوپارے کہ تدوک آ دے تیٹی انتس کہ مرسا کرے، دا جنگ اس ہلو و نہ ہی کس اسینا جیت یاہار ئس۔
اوپارے کہ پولیس و کانود نافذ کروک آ ادارہ غاک کانود و آئین نا عملداری ءِ قائم کریر۔ ای صرف احکامات و پارت آتے جاری کریٹ و افسر و ورناک مشکل انگا حالیت آتیٹی تینا زمواری تے پورو کریر۔ وزیر داخلہ پارے کہ پولیس و کانود نافذ کروک آ ادارہ غاتا ورناک ہرامشکل حالیت آتیٹی کاریم کیرہ، الس اونا بارواٹی ہچ اس تپک ، اوفتا ہم اُرا ارے، لمہ و باوہ و زائیفہ چناک ءُ، اوفک اوفتا انتظار ءِ کیرہ و دا الس نا رکھ اکن مخ ءِ تفرہ۔
اوفتے کن گچین آسراتی و مراعات اتیوہ، پولیس نا گریڈ آتے گچین کرینن، پین آسراتی ہم تننگک۔ وزیر داخلہ وزیراعلیٰ خیبر پختونخوا پرویز خٹک نا بیان آ افسوزنا درشانی ءِ کرے ہراٹی او پارے کہ اونا مون آ ایف سی ءِ سلفنگا۔ وزیر داخلہ پارے کہ ایف سی نہ نون لیگ نا فورس ءِ ، نہ پی ٹی آئی نا داپاکستان نافورس ءِ۔ اوپارے کہ پرویز خٹک دامعاملہ غاسیاست کپ۔
اویات ترفے کہ وزیراعلیٰ پرویز خٹک ہراتم کہ بس نن اونا خیرمقدم ءِ کرین۔ اوپائک کہ کنا کسر ءِ توننگا۔ انت ہراتم او دروبس تو نن اونا کسر ءِ تورین؟ نن اودے پورو پروٹوکول تسن بلکن اونا کنڈآن ودکی سیکورٹی فراوان کننگ نا درخواست آ اودے ای ودکی سکیورٹی فراوان کریٹ۔ اوپارے کہ نن خوانہ کہ انتشار مف، امن مرے، پتھر گڑھ اٹی 400پولیس و ایف سی نا ورناک 8ہزار خلقت آتے توریر۔
اوفتے تون سلہہ ہم ہلوکہ، صرف آنسوگیس ئس وخت اس کہ ارٹ میکو کنڈ سلہہ بند گارڈزآک ئسر۔ وزیر داخلہ ڈی پی او اٹک و آرپی او راولپنڈی کن قائد اعظم پولیس میڈل و 2ایس پیز کن پاکستان پولیس میڈل نا سفارش کننگ نا پڑو کرے۔ اوپارے کہ ہزار آ مچی ءِ توروک آورناتا تعریفی سند ہم تننگک۔ داکان مست وزیرداخلہ کانود نا عملداری ءِ قائم کروک آ پولیس و ایف سی نا ورناتیٹی تعریفی سند بشخ وپانٹ کرے۔
