سلاہکار خارجہ سرتاج عزیز و چین نا وزیر خارجہ نا نیام اٹ بشکیک اٹی اوڑدہی

سلاہکار خارجہ سرتاج عزیز و چین نا وزیر خارجہ نا نیام اٹ بشکیک اٹی اوڑدہی

اسلام آباد(پاکستان نیوز پوائنٹ 3 نومبر2016ء) پاکستان و چین سٹریٹجک پارٹنر شپ تون اوار ہڑتوم آ کنڈآتا تعلقداری نا غٹ بشخ آتیٹی کمکاری ءِ برجاتخنگ آ اتفاق کریر۔ دا امنائی پنچ شنبے آ کرغزستان نا دارالحکومت بشکیک اٹی 15می شنگھائی کمکار تنظیم نا حکومتی سروک کونسل دیوان نا وخت آ سلاہکار خارجہ سرتاج عزیز و چین نا وزیر خارجہ وانگ ئی نا نیام اٹ اوڑدہی نا وخت آ خننگا۔

دفترخارجہ نا ترجمان نا رداٹ ہڑتوم آ راہشونک ہڑتوم آ کنڈآتا تعلقداری نا غٹ پلو آتے شرہ ٹی ایسُر و اوٹی پیش رفت آ است جمی نا درشانی ءِ کریر۔ داوخت آ اوغانستان ، کشمیر و سویلی ایشیاء تون اوار علاقائی و بین الاقوامی معاملہ غاتیا ہم درشانِ خیال کننگا۔ ہڑتوم آ کڑدہ غاک ہڑتوم آ کنڈآتا تعلقداری نا غٹ بشخ آتیٹی کمک و سٹریٹجک پارٹنر شپ آن بابت صلابت ءِ برجاتخنگ آ اتفاق کریر۔

او اقوام متحدہ تون اوار ایلو کثیر الجہتی فورم تیا خڑکی کمکاری آ ہم اتفاق کریر۔ پاکستان شنگھائی کمکار تنظیم نا پورو باسک جوڑ مننگ آ چین نا منت واری ءِ ادا کرے۔ چین نا وزیر پارے کہ چین پاکستان سدابہار دوست و سٹریٹجک پارٹنرءُ۔ اوپارے کہ چین دہشت گردی نا برخلاف جنگ اٹی پاکستان نا قربانی و کوشست آتے قدر انا نظر اٹ ہرک۔