اسلام آباد(پاکستان نیوز پوائنٹ 3 نومبر2016ء) دفتر خارجہ نا ترجمان پاکستان اٹی بھارتی ہائی کمیشن اٹی قائم بھارتی اودیم ایجنسی را و آئی بی نا نیٹ ورک ءِ بے نقاب کرسا پارینے کہ بھارتی ہائی کمیشن نا 8سفارتکار پاکستان اٹی دہشت گردی و تخریبی سرجزآتے کن طالبان تون اوار ایلو دہشت گرد رڑآتون رابطہ غاتیٹی اوار خننگانو۔ رانا جاسوس پاکستان و چین نا نیام اٹ غلط فہمی ودی کننگ کن سی پیک ڈٹ ءِ لتاڑنگ و بلوچستان، گلگت بلتستان تون اوار ملک انا ایلو بشخ آتیٹی نزوری کننگ خوائسرہ ، بھارتی سفارتکار پاکستان اٹی تینا ہند مقصد آتے کن اقلیت آتا کاریم اٹ اتنگ اٹی ہم اوار خننگار و اوفتا تصدیق ءِ کلبھوشن یادیو جاست و پاست نا وخت آ ہم کرینے، بھارت نا سرکاری اودیم ایجنسی تا پاکستان اٹی تخریبی سرجز و دہشت گردی ءِ مالی کمکاری نا فراوانی آ مایوسی مسنے، بھارت مقبوضہ کشمیر اٹی بے گناہ کشمیری تیا بیدادی و انسانی حق انا خلاف ورزی تیان توجوہ ءِ اسہ پلو کننگ نا بے سہب کوشست کننگ ءِ۔
پنچ شنبے آدفتر خارجہ نا ترجمان محمد نفیس ذکریا ہفتہ وار پریس بریفنگ نا وخت صحافی تا کیہی سوج آتا ورندی ءِ ترسا اسلام آباد اٹی بھارتی ہائی کمیشن اٹی بھارتی اودیم ایجنسی را و آئی بی نیٹ ورک ءِ بے نقاب کرے۔ اوپارے کہ بھارتی ہائی کمیشن اٹی تعینات کمرشل قونصلر راجیش کمار اگنی ہوتری (راسٹیشن آفیسر) ، انوراگ سنگھ فرسٹ سیکرٹری کمرشل، امردیپ سنگھ بھٹی ویزااتاشی، سٹاف ممبران دھرمیندراسودھی، وجے کمار ورما، ننداکمار، ’را‘ نا جاسوس و بلبیر سنگھ فرسٹ سیکرٹری پریس آئی بی اسٹیشن چیف و جیابالا سنتھل اسسٹنٹ پرسنل ویلفیئر آفیسر سفارتکاری نا آڑ اٹی پاکستان اٹی تخریبی سرجز آتے کن طالبان آتون اوار ایلو دہشت گرد رڑآتون رابطہ غاتیٹی اوار خننگانو۔
ترجمان صفا کرے کہ دا سفارتکار ویانا کنونشن نا برخلاف کرسا پاکستان و چین نا نیام اٹ غلط فہمی ودی کننگ نا غرض آن سی پیک ڈٹ ءِ لتاڑنگ و پاکستان نا کیہی بشخ آتیٹی نزوری ودی کننگ نا کوشست اٹی اوار خننگانو۔ ترجمان پارے کہ منہ دے مست ناپسندیدہ شخصیت گوندوک سرجیت سنگھ ہم آئی بی نا ایجنٹ و بلبیر سنگھ نا ماتحت کاریم کریرہ، سرجیت تینے ٹیلی کام کمپنی واردنا ملازم ظاہر کرسا عبدالحفیظ نا جعلی پن آن تینا درستی راستی ءِ کرفسا کرے۔
ترجمان پارے کہ ننے داہیت آ بے کچ مایوسی مس کہ بھارت نہ صر ف پاکستان اٹی دہشت گرد سرجز آتے مون آ دننگ و دہشت گرد آتا مالی کمک اٹی اوار خننگا بلکن بھارت سفارتی مشن ءِ ہم تینا ہندا مقصد آتے کن کاریم اٹ اتنگ ءِ۔ ترجمان بھارتی را و آئی بی نا دا جاسوس آتا سرجزآتا سرجم احوال آتے پارسا پارے کہ بھارتی جاسوس نیٹ ورک بلوچستان، سندھ خاص کر کراچی و گلگت بلتستان اٹی تخریب کاری و بے چینی ودی کننگ اٹی اوار خننگار۔
دا سفارتکار آک واپاری سرجزآتا آڑاٹی تینا نیٹ ورک و ایجنٹ آتے تالان کریر و تینا پوزیشن ءِ تہہ نا معلومداری نا دوئی کن بااثر حلقہ غاتسکان رسینگ کن استعمال کریر، دا نیٹ ورک کیہی سرجزآتیان پاکستان و اوغانستان نا نیام اٹ تعلقداری تے نسخان تسر۔ ترجمان بھارتی سفارتکار آتا دزگیری آن بابت اسہ سوج اسے نا ورندی ءِ ترسا پارے کہ سفارتی کارندہ غاتا دزگیری سفارتی آداب و ویانا کنوشن نا خلاف ورزی ءِ۔
