اسلام آباد(پاکستان نیوز پوائنٹ 2 نومبر2016ء) وزیر مملکت دیر و بجلی عابد شیر علی پارینے کہ عمران خان خلقت آتے مایوسی آن بیدس ہچ اس تتنے، الس پی ٹی آن بیزار مسنے، 2018ء ٹی تینا کارکڑد نا بنداؤ آ الس نا عدالت اٹی ولدا ساڑی مرینہ۔ اسہ انٹرویو اسے ٹی اوپارے کہ دا مناسب اف کہ اسہ صوبہ اسے نا وزیراعلیٰ سلہہ و کرین آتے ہتسا ملک انا گچین مروک وزیراعظم آ دھاواکننگ کن برے ولے خیبر پختونخوا نا وزیراعلیٰ ہندن ہی کرے و اودے مسکوہی آمبار اسہ وارولدا بے سہبی تون مون تروئی تما۔
اوپارے کہ پرویز خٹک تینا صوبہ آن صرف منہ سد بندغ اتنگ اٹی سرسہب مننگ کرے ہرا داہیت انا ثبوت ءِ کہ الس پی ٹی آن بیزار مسنے انتئے کہ داخلقت آک تینا حکومتی صوبہ کے پی کے ٹی الس کن ہچ اس کتنے۔ عمران خان مایوسی آن بیدس خلقت آتے ہچ اس تتنے۔ وزیر مملکت پارے کہ وزیراعظم محمد نواز شریف تو پانامہ لیکس آ اولیکو دے آن ہی پاننگ ءِ کہ کمیشن اس جوڑ کے ہراٹی پال انا پال دیر انا دیر مریک۔
پاکستان مسلم لیگ (ن) نا حکومت عدالت آتا شرف ءِ کیک و اونا ہر فیصلہ ءِ امنا کیک ہنداخاطران نن عدالتی کارروائی نا خیرمقدم ءِ کینہ و عدالت ہرادے خوائفک او عدالت اٹی ضرور ساڑی مریک ولے پی ٹی آئی ءِ ہم عدالت اٹی ثبوت تروئی مریک۔ اسہ سوج اسے نا ورندی ٹی عابد شیر علی پارے کہ پرویز مشرف نا دور اٹی ہفت ءُ نیم سال اسکان وزیراعظم محمد نواز شریف نا کل خاہوت نا ٹرائل مسکہ ولے اوڑآ اسہ ہم کرپشن نا کیس اس ثابت مننگ کتو۔
