اسلام آباد(پاکستان نیوز پوائنٹ 2 نومبر2016ء) وزیراعظم محمد نواز شریف دا ہیت آ است جمی نا درشانی ءِ کرینے کہ پانامہ پیپر نا معاملہ سپریم کورٹ آن ایسر مریک و عدالت عظمیٰ ٹی آئین و کانود نا رداٹ اونا فیصلہ مریک۔ الس روڈ آتیا برانز ءِ مسترد کرے، شکرانہ خوانوک آتے بھاز مہالو شکرادا کروئی ئس وخت اس کہ ننا موقف اولیکو دے آن ہی بھاز صفا ءِ۔ اوداہیت ءِ چارشنبے آ بنجائی کابینہ نا دیوان ناکماشی ءِ کرسا پارے۔
وزیراعظم پارے کہ کنکن غٹ آن زیات است جم ہیت دادے کہ پانامہ پیپرزنامعاملہ سپریم کورٹ آن ایسر مریک۔ اوپارے کہ ای دا پدریسہ کوشست کریٹہ و ای تینٹ سپریم کورٹ ءِ کمیشن اس جوڑ کننگ نا درخواست کریٹ۔ اسہ کانود اس ہم جوڑ کرین و اسہ پارلیمانی کمیٹی اس ہم جوڑ کرین ولے ننا دا کوشست آک بے سہب مسر۔ وزیراعظم پارے کہ برانز کروک آتا مقصد دائس کہ دامعاملہ ءِ صرف و صرف روڈ آتیا بش کننگے۔
اوپارے کہ اللہ نا بھلو کرم اسے کہ دا معاملہ سپریم کورٹ اٹی بسنے ہراڑے انشاء اللہ آئین و کانود نا رداٹ اونا فیصلہ مریک۔ وزیراعظم نواز شریف پارے کہ او پاکستان نا الس نا منت وار ءِ ہراک روڈ آتیا برانز ءِ مسترد کریر۔ انشاء اللہ فیصلہ میرٹ آ مریک ، شکرانہ خوانوک آتے بھاز مست شکر ادا کروئی ئسک۔ ننا موقف اولیکو دے آن ہی بھاز صفا ءِ۔ اوپارے کہ سپریم کورٹ اٹی چاہے دا پٹیشن نا قابل سماعت مننگ اٹی شک و شبہ مرے ولے ای تینا وکیل آتے دا معاملہ آ شرہ و سوج کننگ نا تورینٹ و پارینٹ کہ دا پٹیشن ءِ ایڈمٹ مننگ کن ہلنگے۔
دوبہ خلوک آک شرمندہ مریرہ۔ اوپارے کہ 2014ء ٹی کمیشن نا فیصلہ غاتیان پد ہم اوفتے شرمندہ مروئی تماسس۔ اودا قوم انا 126دے ءِ زیان کننگ و معاشی نسخان آتیان گڈ وخت اس ہم شرمندگی نا درشانی ءِ کتو۔ وزیراعظم پارے کہ 2014ء آن گڈ الحمداللہ کنٹونمنٹ بورڈ، لوکل باڈیز ، گلگت بلتستان و آزاد جموں کشمیر نا گچین کاری تیٹی اللہ ننے سرخرو کرے و سرسہبی تس۔
وزیراعظم محمد نواز شریف ملک انا گچین معاشی حالیت آتا ذکر ءِ کرسا پارے کہ منہ دے مست آئی ایم ایف نا ایم ڈی و ایشین ڈویلپمنٹ بینک انا صدر پاکستان آ بسر۔ اوفک پاکستان نا معاشی و اقتصادی شون نا ستاءِ کریر۔ اوپاریر کہ آئی ایم ایف تون ننا پروگرام الحمداللہ ختم مسنے۔ اوفک پاریر کہ پاکستان نا تاریخ اٹی اولیکو وار نن اسہ میکرو اکنامک ریفارمز پروگرام اس پورو کرینن۔ اوپارے کہ داسہ ننے پین محنت کروئی ءِ۔ قوم انا ویل آتے ایسر کننگ و معاشی گچینی کن دے و نن کاریم کروئی ءِ۔
