اسلام آباد(پاکستان پوائنٹ نیوز 16 مئی 2018ء) مسلم لیگ (ن) نا باسک قومی اسمبلی شائستہ پرویز ملک پارینے کہ اپوزیشن جماعت آک ملک انا شونداری نا برخلاف حکومت نا کسر اٹ پنچ سال اٹی اڑاند شاغار، اگہ مسلم لیگ (ن) نا حکومت ءِ کاریم کننگ کن ہلنگاکہ تو ملک شونداری نا کسر آ روان مسکہ۔ چارشنبے نادے پارلیمنٹ ہاؤس نا پیشن میڈیا تون ہیت وگپ کرسا او پارے کہ 2013 ء نا لس گچین کاری تیٹی الس مسلم لیگ (نن) آ پت کرسا اودے سرسہب کرے ہراٹی مسلم لیگ (ن) نا حکومت جوڑ مس۔
اوپارے کہ مسلم لیگ (ن) نا حکومت نا جوڑ مننگ آن پد گڑاس سیاسی جماعت آک حکومت نا کسر اٹی اڑاند شاغار و دھرنہ غاتا کمک اٹ جنگ و جھیڑہ نا چاگڑد اس جوڑ کننگا تانکہ حکومت ءِ نزور کننگ مرے۔ شائستہ پرویز پارے کہ دھرنہ غاتا کمک اٹ چینی زرکاری ءِ توننگ نا بے سہب کوشست کننگا۔ اگہ اپوزیشن جماعت آک ملکی شونداری کن قومی اسمبلی نا فلور آ حکومت ءِ سلاہ تروسر و اوار سلوسر تو اینو ملک شونداری نا کسر آ روان مسکہ۔ ملک آن بے روزگاری نا چٹفنگ و معاشی ہدف آتے دوئی کننگ مسکہ ولے منفی سیاست نا سوب ملکی شونداری نا کسر اٹ اڑاند شاغنگا۔
