نواز شریفءِ کس اسے آن حب الوطنی ناسرٹیفکیٹ ہلنگ ناضرورت اف وزیراعظم شاہد خاقان عباسی نا قومی اسمبلی ٹی خیال آتا درشان

نواز شریفءِ کس اسے آن حب الوطنی ناسرٹیفکیٹ ہلنگ ناضرورت اف وزیراعظم شاہد خاقان عباسی نا قومی اسمبلی ٹی خیال آتا درشان

اسلام آباد (پاکستان پوائنٹ نیوز 15 مئی 2018ء) وزیراعظم شاہد خاقان عباسی پارینے کہ محمد نواز شریف ءِ کس اسے آن حب الوطنی نا سرٹیفکیٹ ہلنگ ناضرورت اف، ہرابندغ دباؤءِ سگسا پاکستان ءِ جوہری واک اس جوڑ کرے اونا برخلاف دوبہ غاک افسوزناک ءُ، قومی سلامتی کمیٹی پاکستان ناکنڈآن رزاک اٹ ممبئی جلہو آتے کن جلہو گیر آتے گدریفنگ نا دوبہ و اونا غلط رپورٹنگ نا مذمت ءِ کرینے، پاکستان نا گل زمین ءِ اسہ ملک اسے نا ہم برخلاف کاریم اٹ اتپننگ نا پالیسی آ سلک، اگہ پارلیمنٹ حق و مفاہمتی کمیشن اس جوڑ کننگ خواہک تو ننے ہچ ءُ اعتراض اس اف۔

سے شنبے نادے قومی اسمبلی ٹی شاہ محمود قریشی، شازیہ مری، صاحبزادہ طارق اللہ و ایلو فتا کنڈآن محمد نواز شریف ناانٹرویو نا بابت چست کروک آ ٹک آتا ورندی ءِ ترسا وزیراعظم شاہد خاقان عباسی پارے کہ تدوک آ منہ دے آن اسہ ویل اس چست کننگ انگ ءِ ہرا اخبار تا زینت جوڑ مننگ ءِ۔ ہراسنگت آک ایوان اٹی دھواں دار ءُ تقریر کرینو، اوفک محمدنواز شریف نااو انٹریوءِ ہم خوان پرور۔

اگہ او انٹرویو ءِ خوانارہ تو داہیت آتے پاتوسہ۔ وزیراعظمپارے کہ غلط دوبہ خلنگ آن مست داسجفوسر کہ او دابندغ آ دوبہ خلنگ ءُ ہرابندغ پاکستان نا دفاع ءِ ناقابل تسخیر جوڑ کرے و دباؤ ءِ سگسا پاکستان ءِ ایٹمی واک اس جوڑ کرے۔ اوپارے کہ بھارتی میڈیا مسکوہی وزیراعظم نا بابت ہراویل آتے چست کرینے او محمد نواز شریف نا اسہ سرجم ءُ انٹرویو اسے نا معمولی ءُ بشخ اس ئس۔

بھارتی میڈیا اودے تینا مسخت کن پین وڑ پیش کرے و ننا بدقسمتی ءِ کہ بھارت تینا مسخت آتے کن انتس کہ کرے نن ہم ہموہیت آتے نوشتہ کننگ نا بناءِ کرین و بھارتی مسخت آتے کن کاریم اٹ بننگ نا بناءِ کرین۔ انت نن تینے بھارتی مسخت آتے کن کاریم اٹ اتنگ نا موکل ایتنہ۔ وزیراعظم پارے کہ محمدنواز شریف ہرامعاملہ غاتیا ہیت کرینے اوفتیا مستین اٹی جنرل (ر) پرویز مشرف، جنرل (ر) شجاع پاشا، جنرل درانی، عمران خان ، و رحمان ملک نا بیان آک ہم ساڑی اریر۔

وزیراعظم پارے کہ انتہاپسند و غیر ریاستی عنصر آتا بارواٹ اسہ جملہ اس غلط وڑاٹ رپورٹ مسنے ، نواز شریف داپاتویسس کہ ہراخلقت ممبئی آ جلہو کریسس او خلقت ءِ پاکستان رزاک اٹ گدریفیسس۔ دا اخذ شدہ تاثر بے بنداو و حق انامنافی و مس رپورٹ ءِ۔ وزیراعظم پارے کہ پاکستان مسلم لیگ (ن) و پاکستان نا حکومت نا دامتکن آ پالیسی مسنے کہ نن تینا گل زمین ءِ پین ملک اسے نا برخلاف کاریم اٹ اتنگ نا موکل تفنہ۔

دابیرہ ننا پالیسی اس ہلوکہ۔ پیپلزپارٹی نا حکومت و پرویز مشرف نا دور اٹی ہم پاکستان نا ہنداپالیسی اس و آخبت نا پالیسی ہم ہندا مریک۔ اوپارے کہ حالیت آتا رداٹ قومی سلامتی نا دیوان ءِ بٹنگ انگا تانکہ اوٹی حالیت سفا مننگ کے۔ دادے بایدے پین رنگ تننگپ و نئے دامعاملہ ءِ تالان کروئی مرے۔ وزیراعظم پارے کہ اگہ پارلیمان نا باسک آک حق و مفاہمتی کمیشن اس جوڑ کننگ خوارہ تو نن داڑکن تیار اُن، داوڑنا کمیشن آ ہم بایدے ہیت مرے ولے قومی سلامتی نا بابت معاملہ غاتے پریس کانفرنس ناسرحال جوڑ کننگ آن بایدے پاناد کننگے انتئے کہ داملک انا مفاد اٹی اف۔