مچ آ قوم و سلہہ بند فوج ہر بہاء آ ملکی دفاع و وت واجہی نا رکھ اکن تیار ءُ، ترجمان دفتر خارجہ دفترخارجہ نا ترجمان محمد نفیس ذکریا نا ہفتہ وار پریس بریفنگ

مچ آ قوم و سلہہ بند فوج ہر بہاء آ ملکی دفاع و وت واجہی نا رکھ اکن تیار ءُ، ترجمان دفتر خارجہ دفترخارجہ نا ترجمان محمد نفیس ذکریا نا ہفتہ وار پریس بریفنگ

اسلام آباد(پاکستان نیوز پوائنٹ 22ستمبر 2016ء) دفترخارجہ نا ترجمان محمد نفیس ذکریا پارینے کہ مچ آ قوم و سلہہ بند فوج ہر بہاء آ ملکی دفاع و وت واجہی نا رکھ اکن تیار ءُ۔ پاک فضائیہ نا مشق آک معمول نا بشخ ءُ ، اڑی واقعہ تون ہچ ءُ تعلق اس اف، پاکستان امن پسند ملک اسے و پرامن ہمسائیگی وزیراعظم محمد نواز شریف نا وژن ءِ، کشمیر جہانی کہول آ تسلیم شدہ تنازعہ ءِ، بھارتی دوبہ غاتے مسترد کینہ، بھارت اٹی ہر واقعہ آن پد بیدس جاست و پاست نا پاکستان آ دوبہ خلنگ بھارت نا عادت جوڑ مسنے، بلوچستان و کراچی تون اوار ملک انا ایلو علاقہ غاتیٹی بھارتی تخریبی سرجزو دہشت گرد آتے مالی اعانت فراوان کننگ نا صفا شاہد ساڑی ارے ہرا مست ہم اقوام متحدہ ءِ تس و وخت بننگ آ پین ثبوت ہم ایتنہ۔

او پنچ شنبے آ دفترخارجہ ٹی ہفتہ وار پریس بریفنگ نا وخت آ صحافی تا سوج آتا ورندی ءِ تسکہ۔ ترجمان مقبوضہ کشمیر نا علاقہ اڑی ٹی واقعہ آن گڈ انا حالیت آتا بابت اسہ سوج اسے نا ورندی ءِ ترسا پارے کہ غٹ پاکستانی قوم و سلہہ بند فوج ہر بہاء آ ملکی دفاع و وت واجہی نا رکھ اکن تیار ءُ۔ پاک فضائیہ نا مشق آک معمول نا بشخ ءُ و اوفتا اڑی واقعہ تون ہچ ءُ تعلق اس اف۔

ترجمان پارے کہ پاکستان اسہ امن پسند ملک اسے و پرامن ہمسائیگی وزیراعظم نا وژن ءِ۔ ترجمان اڑی واقعہ ٹی پاکستان آ خلوک آ دوبہ غاتے مسترد کرسا پارے کہ بھارت اٹی ہر واقعہ آن پد پاکستان ءِ مورد دوبہ ٹہرائفنگ نئی دہلی نا اسہ عادت اس جوڑ مسنے، بھارت مقبوضہ کشمیر اٹی بے گناہ کشمیری تیا بیدادی و انسانی حق انا خلاف ورزی تیان دنیا نا توجوہ ءِ اسہ پلو کننگ کن داڈول نا ہتھکنڈہ غاتے کاریم اٹ اتسا کیک وخت اس کہ منہ وخت مست بلوچستان اٹی دزگیر بھارتی راایجنٹ نا پاکستان اٹی تخریب کاری و دہشت گرد آتا مالی اعانت نا اعترافی بیان آتے دنیا خنانے۔

ترجمان پارے کہ نن مست ہم بھارتی نیام تمنگ نا ثبوت آتے اقوام متحدہ نا مون آ پیش کرینن و وخت بننگ آ پین ثبوت ہم ایتنہ۔ ترجمان اڑی سیکٹر آن بابت نیپالی وزیراعظم تون منسوب بھارتی میڈیا نا خبر آتے من گھڑت گوندا و پارے نیپالی وزیراعظم ہاؤس نا کنڈآن جاری بیان اٹی پاننگانے کہ بھارتی میڈیا نیپالی وزیراعظم نا بیان ءِ مروڑترسا پیش کرینے۔ براہمداغ بگٹی نا بھارتی شہریت آن بابت اسہ سوج اسے نا ورندی ءِ ترسا ترجمان پارے کہ داحقیقت ہم بھارت نا بلوچستان اٹی گہری نیام تمنگ ءِ ثابت کننگ کن بس ءِ۔

ترجمان کشمیر نا بابت اسہ سوج اسے نا ورندی ءِ ترسا پارے کہ دنیا نا کیہی ملک آک کشمیری الس نا حق خودارادیت نا مخ تفی ءِ کرینو، او آئی سی نا 57باسک ملک آک ہمیش کشمیری الس نا جہد نا مخ تفی ءِ کرینو۔ اسہ سوج اسے نا ورندی ءِ ترسا ترجمان پارے کہ پاکستان غٹ دہشت گرد آتا برخلاف بے پرخ کارروائی کننگ ءِ۔ آپریشن ضرب عضب نا نتیجہ غاتے دنیا امنا کرینے۔ پاکستان وخت اس ہم تینا گل زمین ءِ ایلو ملک آتیٹی دہشت گردی نا غرض آن کاریم اٹ اتنگ کن ہلیپک۔ اوپارے کہ پاک فوج دا علاقہ غاتا ہم کنٹرول ءِ سنبھالانے ہراڑے بھلا بھلا طاقت آتے بے سہبی تون مون تروئی تماسس۔