اسلام آباد(پاکستان نیوزپوائنٹ 26اپریل 2018ء) استیں حکومت ءِ گوزوکیں مالی سال ءِ معاشی کرد ءِ بابت ءَ اقتصادی سروے 2017-18 پیش کنگ بوت۔ بُنجاھی وزیر منصوبگ بندی ءُُ دیمروئی احسن اقبال ءَ ادا آدینگ ءِ روچءَ پُر مڈاھیں پریس کانفرنس ءِ ساھت ءَ اقتصادی دیمروئی ءِ چار ءُُ تپاسی پیش کت۔ مزن وزیرر ءِ مشیر برائے ھزانگ ڈاکٹر مفتاح اسماعیل، مزن وزیر ءِ ھاسیں کمکار برائے محصولات ہارون اختر، وزیر مملکت برائے ھزانگ رانا محمد افضل ءُُ سیادی داروکیں کارندہ آں ھم اے موہ ءِ سر ءَ آئی ء ِ ھمبراہ اتنت۔
بُنجاھی وزیر منصوبگ بندی ءُُ دیمروئی احسن اقبال ءَ استیں حکومت ءَ را گوزوکیں مالی سال ءِ ساھت ءَ معاشی کرد ءِ سر ءَ چمشانک دیان ءَ گوشت کہ وھد ءِ مسلم لیگ (ن) ءِ حکومت ءَ 2013ءَ سروکی ءَ اتکگ گڈا راجی معشیت ءُُ ریاست بزگری آنی آماچ بوتگ ھاسیں رنگ ءَ ھاٹیگ ءِ شوبگ تباھی ءِ آماچ اَت ءُُ ایمنی ءِ جاور ھال ھراب اتنت۔ معاشی زبھری ءِ سبب ءَ ملک ءِ جاور ڈول مہ ڈول اتنت، ملک ءَ بے روزگاری بُرز ءَ ات، ملک ءِ معاشی حب کراچی ءَ بھتہ گروک آنی دست ءَ اَت ، آئی ءَ گوشت کہ استیں حکومت ءَ جوانیں کرد ءُُ گامگیج آنی آسری پیسلہ کت ءُُ حکومت ءَ ملکی دیمروئی ءِ واستہ دراج بُریں پلان 2025جوڑ کت۔
آئی ءَ گوشت کہ گوزوکیں سال ءَ نمبگ ءِ کساس 5.8درسد بوت، اگاں سیاسی بے یکیمی ءِ جاور ھال مہ بوت اِنت گڈا 6.1درسد ءِ ھد ءُُ ابیل آسانی ءَ در جنگ بوت نہ کت اَنت۔ مئے دور ءُُ باریگ ءَ ھاٹیگ ءِ شوبگ ءَ ریکاڈی ایں سرمایہ کاری بوتگ، گوستگیں چار سال آں راجی نظام ءَ یازدھ ہزار میگاواٹ توان ءَ ھوار کنگ بوتگ، پنچ سال ءَ 1750کلومیٹر موٹروے ءِ جوڑیشت بندات کنگ بوت، پاکستان مرچی جنوبی ایشیا ءِ دُرستاں چہ مستریں دیمروئی کنوکیں معشیت ءِ جوڑ بوتگ، حکومت ءَ وتی آسراتی آں چہ سیکورٹی آپرییشنز بندات کتگ، آپریشن ضرب عضب ءُُ رد الفساد ءَ چہ پاکستان محفوظ ملک ءِ جوڑ بوتگ۔
آئی ءَ گوشت کہ استیں حکومت ءِ معاشی دیمروئی ءَ را میاں اوستمانی تک ءَ ھم تسلیم کنگ بوتگ۔ آئی ءَ گوشت کہ سی پیک ءِ بدولت ءَ پاکستان پڑ ے جوانتریں ملک جوڑ بیت۔
