بھارتی سروکی ءِ بلوچستان نا تہہ نا معاملہ غاتا بابت بیان بازی آن پاناد کروئی مرے، سروک بلوچ رابطہ اتفاق تحریک پرنس محی الدین بلوچ

بھارتی سروکی ءِ بلوچستان نا تہہ نا معاملہ غاتا بابت بیان بازی آن پاناد کروئی مرے، سروک بلوچ رابطہ اتفاق تحریک پرنس محی الدین بلوچ

اسلام آباد(پاکستان نیوز پوائنٹ 22ستمبر 2016ء) بلوچ رابطہ اتفاق تحریک (برات) نا سروک مسکوہی بنجائی وزیر پرنس محی الدین بلوچ پارینے کہ بھارتی سروک ءِ بلوچستان نا تہہ نا معاملہ غاتا بابت بیان بازی آن پاناد کروئی مرے۔ پنچ شنبے آ جاری بیان اٹی اوپارے کہ تحریک پاکستان نا وخت آ بلوچ الس و سروک آک اسہ اہم کڑد اس ادا کریر و وطن نا یکجہتی و سالمیت کن بے مثل قربانی تسر۔

بلوچستان نا بارواٹی گڑاس بھارتی سیاستدان تا بیان آتا حوالہ ءِ ترسا اوپارے کہ بلوچستان نا معاملہ غاتیٹی ہندوستان نا اوار مننگ نا ٹھوس شاہدی ساڑی ءِ و بلوچستان نا حالیت آتے خراب کننگ اٹی بھارت براہ راست اوڑدہ ءِ، اصل ہیت دادے کہ بھارت بلوچستان نا تہہ نا معاملہ غاتیٹی نیام تمسا مچ آ دنیا نا خن تے مقبوضہ کشمیر اٹی تینا بیدادی آن اسہ پلو کننگ خواہنگ ءِ۔

اوپاکستان نا بلوچ آتا کنڈآن قربانی تا تاریخ ءِ مون آ تخسا پارے کہ تحریک آجوئی نا وخت آ قائد اعظم محمد علی جناح وگودی فاطمہ جناح نا دورہ قلات نا وخت خان آف قلات میزبانی نا فرض ءِ سرانجام تس و رضاکارانہ وڑاٹ ملک ءِ سوگو کننگ کن ریاست قلات ءِ ضم کننگ نا پڑو ءِ کریسس۔ اوپارے کہ بلوچ الس محب وطن ءُ ہراک ہمیش پاکستان ءِ شون ہلوک و شونہال ریاست اس جوڑ کننگ کن غٹ کوشست آتا مخ تفی ءِ کرینو۔ پرنس محی الدین بلوچ پارے کہ نن بلوچستان نا گچینی کن کاریم کرسا کینہ و داپلیٹ فارم آ غٹ بلوچ قوم تے یکجا کننگ کن غٹ لائخی تے کاریم اٹ اتینہ۔ اوپارے کہ پاک چین اقتصادی راہداری ڈٹ آن استفادہ دوئی کننگ کن بلوچستان نا ورنانسل ءِ تکنیکی تربیت تننگے۔