اقوام متحدہ(پاکستان نیوز پوائنٹ 21ستمبر 2016ء) وزیراعظم محمد نواز شریف مقبوضہ کشمیر اٹی بھارت نا کنڈآن انسانی حق انا خلاف ورزی تیا جہانی برادری توجوہ ءِ مبذول کرفنگ کن تینا کوشست آتے ترند کرینے و اقوام متحدہ جنرل اسمبلی نا 71می دیوان نا وخت آ نیو یارک اٹی جہانی کسرشون آتون اوڑدہی تے برجاتخانے۔ ترک صدر رجب طیب اردوان و جاپانی وزیراعظم شینز وایبے تون سے شنبے آ مروک آ اوڑدہی تیان بیدس وزیراعظم محمد نواز شریف اقوام متحدہ نا سیکرٹری جنرل بان کی مون نا اِرغ اٹی کیہی جہانی کسرشون آتون غیر رسمی اوڑدہی ہم کرے۔
اوجنرل اسمبلی ہال اٹی اقوام متحدہ ٹی عمومی شرہ نا افتتاحی نشست اٹی شریک گڑاس کسرشون آتون ہم اوڑدہی کرے۔ سالانہ دیوان اٹی صدور، وزراء اعظم آتون اوار کم و ود 140 بڑزکو کہول ناشخصیت آک شرکت کننگ ءُ۔ خارجہ سیکرٹری اعزاز احمد چوہدری صحافی تے بریفنگ ترسا پارے کہ وزیراعظم محمد نواز شریف نا ”کشمیر مشن“ پبی وڑاٹ مون آ ہِننگ ءِ دنکہ مقبوضہ کشمیر اٹی حالیت آتا بارواٹی مندوبین اٹی گیشتر آگاہی خننگک ہراڑے بھارتی فوج کشمیری الس نا حق خودارادیت نا تحریک ءِ لتاڑنگ نا کوشست کننگ ءِ۔
جاپانی ہم منصب تون تینا اوڑدہی ٹی وزیراعظم جموں و کشمیر نا ویل ءِ تالان کرسا اوفتے بھارت نا دوتے اٹ مقبوضہ کشمیر نا الس نا مشکلات آتا بارواٹی معلومدار کرے۔ ہڑتوم آ کنڈآتا تعلقداری نا بابت آن ہڑتوم آ وزیراعظم آک واپاری و اقتصادی تعلقداری نا پین سوگوی نا بارواٹی ہم ہیت وگپ کرے۔ وزیراعظم پاکستان نا اقتصادی شون و ملک اٹی جاپانی زرکاری ٹی ودکی نا گمان آتیا ہیت وگپ کرے۔
وزیراعظم محمد نواز شریف ترکی نا صدر رجب طیب اردوان نا کشمیری الس کن پبی مخ تفی نا درشانی آ منت واری ءِ ادا کرسا اودے کشمیر نا تازہ انگا حالیت آتا بارواٹی معلومدار کرے و اوفتے آ زورشاغا کہ او کشمیر اٹی انسانی حق انا خلاف ورزی تے بند کرفنگ کن بھارت آ زور شاغر۔ ہڑتوم آ کنڈآک ہڑتوم آ کنڈآتا زرکاری گام گیج آتیا است جمی نا درشانی ءِ کرسا واپاری و زرکاری تعلقداری تے اوفتا حقی لائخی نا رداٹ پین مون آ دننگ آ اتفاق کریر۔
اوغانستان، شام، عراق و دے ٹکی نیامی ٹی علاقائی حالیت آتیا ہم ہیت وگپ مس۔ وزیراعظم نیو کلیئر سپلائرگروپ نا رکنیت کن پاکستان نا مخ تفی آ ہم ترک حکومت نا منت واری ءِ ادا کرے۔ داکان بیدس وزیراعظم نا سلاہکار خارجہ امور سرتاج عزیز ہم کشمیر کاز کن لابنگ کرسا اختہ دے گدریفے۔ اوجاپان، آسٹریا و سوئٹزر لینڈ نا تینا ہم منصب آتون اوڑدہی کرے۔
دااوڑدہی تیٹی کشمیر نا ویل و بھارت نا کنڈآن انسانی حق انا صریح خلاف ورزی تے تالان کرسا بین الاقوامی برادری آ زورشاغا کہ او اقوام متحدہ نا قرارداد آتا رداٹ کشمیر نا ویل انا ایسری ٹی کمک کیر۔ وزیراعظم نا سلاہکار اوغانستان نا حالیت و انسداد دہشت گردی کن پاکستان نا سرسہب کوشست آتیا ہم ہیت وگپ کریر۔ اوجوہری عدم پھیلاؤ وجوہری رکھ انا بشخ اٹی سوگوساکھ انا بنداو آ نیو کلیئر سپلائرگروپ نا رکنیت کن پاکستان کن مخ تفی ہم خوائس۔ وزیراعظم محمد نواز شریف اقوام متحدہ نا جنرل اسمبلی دیوان نا وخت آ ایرانی صدر حسن روحانی، چینی وزیراعظم لی کی چیانگ و اقوام متحدہ نا سیکرٹری جنرل بان کی مون تون ہم اوڑدہی کیک۔
