بھارتی فوجی کیمپ آ جلہو نا دوبہ غاک مقبوضہ کشمیر نا بگڑینگوک آ حالیت آتیان توجوہ ءِ اسہ پلو کننگ نا بھارتی کوشست اسے ، سرتاج عزیز وزیراعظم نا سلاہکار خارجہ امور نا نیویارک آ سرمننگ آن پد بیان

بھارتی فوجی کیمپ آ جلہو نا دوبہ غاک مقبوضہ کشمیر نا بگڑینگوک آ حالیت آتیان توجوہ ءِ اسہ پلو کننگ نا بھارتی کوشست اسے ، سرتاج عزیز وزیراعظم نا سلاہکار خارجہ امور نا نیویارک آ سرمننگ آن پد بیان

اسلام آباد(پاکستان نیوز پوائنٹ 19ستمبر 2016ء) وزیراعظم نا سلاہکار خارجہ امور سرتاج عزیز یک شنبے آ مقبوضہ کشمیر اٹی بھارتی فوجی کیمپ آ جلہو نا بابت پاکستان آ خلوک آ بھارتی دوبہ غاتے بے بنداو و غیر زمہ دارانہ گوندسا مسترد کرینے و پارینے کہ دا دوبہ غاک مقبوضہ کشمیر نا بگڑینگوک آ حالیت آتیان توجوہ ءِ اسہ پلو کننگ نا بھارتی کوشست ءِ۔ وینزویلا آن نیویارک آ سرمننگ آن دمدستی گڈ تینا اسہ بیان اسے ٹی سلاہکار خارجہ پارے کہ پاکستان بھارت نا سول و فوجی سروک آتا داوڑنا غیر مصدقہ و سخت بیان آتیا شدید گڑتی تخک ہرا تدوک آ دے مقبوضہ کشمیر نا اوڑی سیکٹر اٹی بھارتی فوج آ جلہو آن پد جاری کننگا۔

اوپارے کہ پاکستان بھارتی وزیراعظم نریندر مودی نا حکومت نا بڑزکو کمامدار آتا کنڈآن خلوک آ بے بنداو و غیر زمہ دارانہ دوبہ غاتے صفا وڑاٹ مسترد کیک ۔ سلاہکار خارجہ پارے کہ دا مقبوضہ کشمیر اٹی برہان وانی نا شہیدی آن پد انسانی حق انا سنگین خلاف ورزی تیان جہانی برادری نا توجوہ ءِ اسہ پلو کننگ نا بھارتی کوشست اسے۔ اوپارے کہ داہیت ءِ سرپند مننگ نا گرج ءِ کہ مقبوضہ کشمیر نا حالیت آک پاکستان نا ودی کروک افس بلکن دا مقبوضہ کشمیر آ بھارت نا غیر کانودی کوزہ و جبرو استبداد نا سریس تاریخ نا نتیجہ ءِ ہرانا وخت آ ہزار آ بندغ آک تپاخت کریر۔

بھارت نا غاصبانہ کوزہ نا برخلاف برانز نا ساڑی آ لہر و 73دے آن زیات وخت آن جاری کرفیو نا وخت آ اسہ سد آن زیات بے گناہ کشمیری تپاخت و ہزار آک ٹھپی مسر۔ پیلٹ گن نا اندھا دھند سم کاری نا نتیجہ ٹی کشمیری ورنا تا بھلو کچ اس تینا خن تیان کور مسنو و کودک کشمیری الس، بزرگ ، چنا و نیاڑی تیان اسٹ اس ہم بھارتی فوج انا بے رحمانہ ظلم آن رکھوک افس۔ داحالیت آتیان جہانی برادری نا ضمیر بایدے بیدار مرے۔ سرتاج عزیز پارے کہ داہیت قابل مذمت ءِ کہ بھارت نا اسہ وزیر اس بیدس جاست وپاست نا بھارتی فوجی کیمپ آ جلہو نا دوبہ ءِ پاکستان آ خلکونے۔ اوپارے کہ دا بیان جہانی برادری ءِ گمراہ کننگ نا بھارتی کوشست آتا بشخ تانکہ مقبوضہ کشمیر اٹی بھارتی ظلم آ پڑدہ شاغنگ مرے۔