راولپنڈی(پاکستان نیوزپوائنٹ 22مارچ2018ء) چین نا اسہ بڑزکو کہولی ڈل اس پنچ شنبے نادے وزارت دفاعی پیداوارہ نا دورہ ءِ کریر۔ داوخت آ ہڑتوم آ کنڈآتا تین پہ تینی تعلقداری تیا اسہ دیوان اس اڈ ہلک۔ سیکرٹری دفاعی پیداوار لیفٹیننٹ جنرل (ر) محمد اعجاز چوہدری و ”سسٹنڈ“ نا نائب منتظم ژان بن ژودیوان نا کماشی ءِ کرے۔ دیوان اٹی ہڑتوم آ کنڈآتا دفاعی پیداوار نا بشخ اٹی کمکاری آ است جمی نا درشانی ءِ کننگا و ساڑی آ تعلقداری تے پین مون آ دننگ اٹی است خواہی ظاہر کننگا۔
ہڑتوم آ کنڈآن دفاعی کمکاری نا چندی ڈٹ آتا آوار عمل ءِ المی جوڑ کننگا۔ چینی ڈل انا سروک ژان بن ژو بنجائی وزیر دفاعی پیداوار رانا تنویر حسین تون ہم اوڑدہی کرے۔ چینی ڈل دفاعی بشخ و فوجی واپار اٹی است خواہی ظاہر کرے۔ بنجائی وزیر غٹ بشخ آتے ٹی ہڑتوم آ ملک آتا کمکاری نا مریس تاریخ نا ستاءِ کرے۔ اوپاریر کہ دا تعلقداریک ہڑتوم آ ملک آتا الس ناشرحالی آٹی ءُ و پین ملک اسے نا برخلاف افس۔
اوکمکاری نا ایلو بشخ آتا شناخت کننگ نا گرج ءِ مون آ تخار ہراڑآن پاکستان و چین نا نیام اٹ ہڑتوم آ کنڈآتا تعلقداری تے پین سوگو جوڑ کننگ اٹ کمک رسینگک۔ اومستی پارے کہ پاکستان چین اتون تعلقداری تے بھاز اہمیت ایتک۔ ہڑتوم آ کنڈآتیان شرفدار آک دفاعی بشخ اٹی اسیجائی کمکاری نا مون آ دننگ آ است جمی نا درشانی ءِ کریر۔
