اسلام آباد(پاکستان نیوزپوائنٹ 22مارچ2018ء) وزیر مملکت اطلاعات ، نشریات ، قومی تاریخ ادبی میرات مریم اورنگزیب پارینے کہ پاکستان وونٹ انا واک اٹ جوڑ مس، پاکستانی تا دتر اٹ جمہوریت پیش تمنگ کپک، پاکستان قائداعظم نا وژن و علامہ اقبال نا تغ انا تعبیر ءِ، خوانوک آ قومک تعمیر نا سفر اٹی تینا پبی کڑد ءِ ادا کیرہ، پاکستانیک اگہ یکجا مریر تو اوفتے پین ہچ گہس نا ضرورت مفک، نن بابائے قوم انا قول ”تنظیم، اتحاد و یقین محکم “ آ عمل کرسا ہروڑنا مشکل آتون آسانی اٹ مون تننگ کینہ۔
داخیال آتا درشانی ءِ او ڈائریکٹوریٹ آف الیکٹرانک میڈیا اینڈ پبلیکیشنز نا کنڈآن نظریہ پاکستان کونسل نا کمک اٹ یوم پاکستان نا مناسبت آن تحریک پاکستان نا عظیم راہشون تے خراج عقیدت پیش کننگ کن اڈ ہلوک آ عکسی نمائش آن تران کرسا کرے۔ داوخت آ سیکرٹری اطلاعات سردار احمد نواز سکھیرا ، ڈی جی ڈائریکٹوریٹ آف الیکٹرانک میڈیا اینڈ پبلیکشنز عبدالواحد خان و چندی اسکول آتا طالب علم آک ساڑی ئسر۔
وزیر مملکت دود آن تران کرسا پارے کہ یوم پاکستان نا وخت آ مچ آ قوم ءِ مبارکباد پیش کیوہ و داڑے چندی سرجزآتے ٹی بشخ ہلوک آ و کٹوک آچناتے مبارکبادی ایتیوہ۔ اوپارے کہ ننے تینا بولی تون مابت ءِ ، دنیا ٹی ہندا ننا پہچان ءِ ، انگریزی بولی ہم المی ءِ انتئے کہ نن گلوبل ولیج اٹ رہینگنہ ولے تینا بولی نا ہچ ءُ بدل اس اف، نن ہراڑے کہ کان ، ننا درستی راستی تینا بولی و دودوربیدگ آن بایدے مرے۔
اوپارے کہ ڈائریکٹوریٹ آف الیکٹرانک میڈیا اینڈپبلیکیشنز جدید و گچین وڑاٹ نمائش اس اڈ تسنے، پاکستان اٹی داوڑنا نمائش بایدے اڈ تننگے، نمائش نا کمک اٹ پاکستانی دودوربیدگ و تاریخی عہد ءِ تالان کننگانے۔ اوپارے کہ پاکستان قائد اعظم نا وژن و علامہ اقبال نا تغ انا تعبیر ءِ، ورنانسل ہم پاکستان نا تعمیر اٹ بشخ شاغنگ ءُ ، قائد اعظم تینا تاریخی تقریر آتے ٹی تعلیم نا دوئی آ زور شاغانے۔
وزیر مملکت مریم اورنگزیب پارے کہ خوانوک آ قومک تعمیر نا سفر اٹ تینا پبی کڑد ءِ ادا کیرہ۔ اوپارے کہ جمہوریت پاکستان نا دتر اٹ اوار ءِ، ہراتم کہ جمہوریت ءِ کشنگا او زیات واک اٹ پدی بسنے۔ وزیر مملکت پارے کہ قیام پاکستان آن پد بھاز انگا سیاہ دورک بسر ، پاکستان وونٹ انا واک اٹ جوڑ مسنے ، پاکستانی تا دتر جمہوریت آن پیش تمنگ کپک۔ مریم اورنگزیب پارے کہ پاکستان شونداری نا کسر آ روان مسنے ، ملک اٹی دہشت گردی ٹی واضح کمتی اس بسنے ، لوڈشیڈنگ چٹنگ ءِ ، موٹروے جوڑ مننگ ءِ، مستین اٹی داخہ شونداری کاریم متنے اخس کہ گدرینگوک آ چار ءُ نیم سال اٹ مس، 66 سال اٹی شاہراہ تا دُن ءُ نیٹ ورک اس جوڑ متنے ہرا مسلم لیگ (ن) نا دورحکومت اٹ جوڑ کننگانے۔
داکان مست وزیر مملکت نمائش نا بناءِ کرے و تحریک پاکستان نا بابت 200 نایاب عکس آتے ہُرا۔ وزیر مملکت پاکستانی بیرک ءِ چست کرے۔ اوکان پد دود اٹی مصوری، است بڈی، مضمون نویسی و ڈرائنگ نا مقابلہ غاتے ٹی نمان پوزیشن دوئی کننگ و شرکت کروک آتے ٹی سرٹیفکیٹ بشخ وپانٹ کرے۔ وزیر مملکت داوخت آ کیک اس ہم کاٹ کرے۔
