اسلام آباد(پاکستان نیوز پوائنٹ 09ستمبر 2016ء) بنجائی کابینہ دیامر بھاشاڈیم کن ڈغار نا دوئی کن معاوضہ نرخ آتا منظوری ءِ تس۔ جمعہ آ وزیراعظم آفس اٹی کابینہ دیوان نا کماشی ءِ کرسا وزیراعظم محمد نواز شریف زہمی تے معاوضہ غاتا بشخ وپانٹ اٹی شفافیت ءِ باوری جوڑ کننگ ناپارت کرینے۔ اوپارے کہ پن بجلی نا بھلا بھلا ڈٹ جاٹ آتا جوڑ جاڑ آن ملک انا توانائی نا گرج آتے پورو کننگ و سیلاب نا توننگ اٹی بھاز زیات کمک رسینگک۔
اوپارے کہ ساڑی حکومت پاکستان ءِ مون تروک توانائی نا ویل آتے ایسر کننگ نا توجوہ تخانے، ننا ڈٹ جاٹ آتیٹی دا رداٹ گونڈ، درمیانہ و سریس وختی ڈٹ آک اوارو۔ وزیراعظم میڈیا آفس نا کنڈآن دستیاب سرجم احوال آتا رداٹ وزیراعظم پارے کہ دیامر بھاشا ڈیم نا زہمی خلقت آتے معاوضہ غاتا زر انا بشخ و پانٹ اٹی شفافیت ءِ برقرار تخوئی مرے۔ اوپارے کہ ننا حکومت جہانی بینک انا کمک اٹ داسوڈیم کن سرمایہ نا بست و بند ءِ کرینے وخت اس کہ دیامربھاشاڈیم نا جوڑ جاڑ کن غٹ درکار گام گیج آتے چست کننگانے۔
