وزیراعظم محمدنواز شریف نا بنجائی وزیرشاہد خاقان عباسی تون اوڑدہی ٹی ہیت وگپ

وزیراعظم محمدنواز شریف نا بنجائی وزیرشاہد خاقان عباسی تون اوڑدہی ٹی ہیت وگپ

اسلام آباد(پاکستان نیوز پوائنٹ 05ستمبر 2016ء) وزیراعظم محمد نواز شریف پارینے کہ حکومت لس بندغ نا مشکلات آتے کم کننگ کن توانائی ، بنداوی ڈھانچہ نا شون و راجی شرحالی نا ڈٹ آتون اوار غٹ کلیدی بشخ آتیٹی ترند تر پیش رفت کننگ ءِ ، نن عملی گام گیج آتیا باور کینہ و کیہی بشخ آتیٹی بھلا بھلا ڈٹ آک ننا کارکڑد نا ثبوت ءُ۔ اوداہیت ءِ بنجائی وزیر پٹرولیم و قدرتی وسیلہ شاہد خاقان عباسی تون دوشنبے آ ایوان وزیراعظم اٹی ہیت وگپ کرسا پارے۔

وزیراعظم پارے کہ خلقت آتے جوانی اٹ سماءِ کہ ننا پالیسی تا مقصد الس ءِ مون تروک اہم ویل آتا ایسرکننگ آ توجوہ تخسا ملک انا خذمت ءِ۔ اوغٹ ڈٹ آتیا عملدرآمد اٹی شفافیت ءِ باوری جوڑ کننگ و تعلقدار کانود نا سختی اٹ پیروی آ زورشاغسا پارے کہ ایل این جی پاور پروجیکٹس ترندی اٹ پورو کننگر تانکہ ہڑزان بجلی پیداوار ممکن مرے۔ اوپارے کہ پاکستان تون 2018ء اسکان تینا اُرائی و صنعتی گرج آتے پورو کننگ کن کافی بجلی دستیاب مریک، دا ڈٹ آتا پوروی آن صارف آتے ہڑزان توانائی ملک۔

وزیراعظم پارے کہ بدقسمتی اٹ مسکوہی حکومت آک توانائی تون اوار معیشت نا اہم بشخ آتے نظر انداز کریر۔ اوپارے کہ ملک اٹی امن و ایمنی نا گچین حالیت آتیان ہندی و درملکی زرکار آتا قومی معیشت نا کیہی بشخ آتیٹی زرکاری نا است بڈی مسنے، نن اقتصادی بحالی و شون نا انقلابی ایجنڈہ نا پیروی کن پرعزم اُن۔ داوخت آ وزیرپٹرولیم وزیراعظم ءِ پارے کہ گدو ونندی پور پاور پروجیکٹس کن بروک آ سال گیس انا فراوانی ءِ باوری جوڑ کننگ نا غٹ بست و بند ساڑی ءِ۔

اوپارے کہ سوئی ناردرن گیس پیپ لین لمیٹڈ و سوئی سدرن گیس پیپ لین لمیٹڈ مچ آ ملک اٹی ترسیل و بشخ و پانٹ نا نیٹ ورک ءِ گچین جوڑ کننگ اٹی بھلو زرکاری اس کننگ ءِ۔ بنجائی وزیر پارے کہ ساڑی آ حکومت نا پالیسی تا بدولت تیل و گیس انا تلاش نا کمپنیک ملک انا کیہی بشخ آتیٹی کاریم کننگ ءُ و اوفک نمان دریافت آتے کرینو۔ اوپارے کہ ملک انا توانائی نا گرج آتے پورو کننگ کن ایل این جی ٹرمینلز و گیس پیپ لین آتا جوڑ جاڑ اتون اوار گیس آن تعلقدار ڈٹ آتیا کاریم سرگرمی اٹ جاری ءِ۔