پشاور(پاکستان نیوز پوائنٹ 02 ستمبر 2016ء) مردان نا ضلع کچہری ٹی اسٹ آن پد ایلو اِرا دھماکہ غاتا نتیجہ ٹی 11بندغ تپاخت وخت اس کہ 27 ٹھپی مسر، ڈی آئی جی مردان اعجاز خان نا رداٹ اولیکو دھماکہ کچہری گیٹ آ خودکش جلہو گیر دستی بمب اس خسسا کرے وخت اس کہ ارٹ میکو دھماکہ خود کش اس ئس۔ ڈی آئی جی مردان نا رداٹ پولیس خودکش جلہو گیر ءِ کچہری گیٹ آ توننگ نا کوشست کریر تو او پولیس آ دستی بمب خسا و تہہ ٹی پترینگ انگ نا کوشست کرے واہم پولیس سم کاری کرسا خودکش جلہو گیر ءِ تینا ہدف بار اسکان سرمننگ کن الیتوس و کچہری نا دنگ انا تہہ ٹی ہی اودے تپاخت کریر۔
ڈی آئی جی مردان اعجاز خان نا رداٹ دھماکہ ٹی تپاخت کروک آ 11بندغ اٹی مسہ وکیل و اِرا پولیس کارندہ اوارووخت اس کہ 27 ٹھپی مسر ہرافتے ٹی مسہ پولیس کارندہ و مسہ وکیل ہم اوارو۔ ٹھپی مروک آتیٹی 18 بندغ ءِ بنائی طبی امداد آن گڈ ہسپتال آن فارغ کننگا۔ ڈی آئی جی مردان نا رداٹ سہب انا وختی پشاور اٹی ورسک نا ہند آ پیش بروک آ واقعہ آن گڈ سیکورٹی ءِ ہائی الرٹ کننگاسس و مردان اٹی کیہی دفتر، اقلیت آتا عبادت گاہ و تعلیمی ادارہ غاتیا سیکورٹی ءِ سخت کننگانے واہم واقعہ نا جاست و پاست جاری ءِ۔
