سبی (پاکستان نیوز پوائنٹ یکم ستمبر 2016ء) وزیراعظم محمد نواز شریف پارینے کہ بلوچستان اٹی روڈ آتا جوڑجاڑ آن شون ، امن و شونہالی نا اسہ پوسکن ءُ دور اسے نا بناء مننگ ءِ، پسماندہ علاقہ غاتیٹی روڈ آتا جوڑ جاڑ حکومت نا اولین اولیت ءِ، سی پیک ڈٹ دژمن تے ہضم مفننگ ءِ ، ہموتہہ نا و پیشن نا واک آک بے نقاب مسر ہرافک بلوچستان نا الس ءِ محروم کریر، اللہ نا فضل و کرم اٹ دہشت گرد آتا مخ انا ملی ءِ پرغان، تینا مزل آ سرمرسا دم کشون، بلوچستان نا الس نا تغ پورو مننگ نا وخت بسنے ، شون برائے قومی وحدت نا تصور ءِ مون آ دننگ اُن۔
او پنچ شنبے آ داڑے سبی۔کوہلو شاہراہ نا افتتاح نا وخت آ تران کریکہ۔ داوخت آ گورنر بلوچستان محمد خان اچکزئی ، وزیراعلیٰ بلوچستان سردار ثناء اللہ زہری ، بنجائی وزیر شون و ڈٹ بندی احسن اقبال، بنجائی وزیر پورٹس اینڈ شپنگ حاصل بزنجو ، بنجائی وزیر سیفران لیفٹیننٹ جنرل (ر) عبدالقادر بلوچ، سلاہکار قومی سلامتی ناصر جنجوعہ ، کمانڈرسدرن کمانڈ لیفٹیننٹ جنرل عامر ریاض و این ایل سی نا سروک میجر جنرل مشتاق ہم ساڑی ئسر۔
وزیراعظم پارے کہ ہر پوسکنا کسر اسہ پوسکن ءُ گمان اسے نا کسر ءِ ملک، اینو ہرا اسہ روڈ اسے نا افتتاح مسنے تو دا صرف کسراسے نا افتتاح اف بلکن شونہالی و امن و شون نا گمان آتا درگہ ءِ ملنگ ءِ۔ بلوچستان نا شونہالی ننا مزل ءِ، اوڑاسکان سرمننگ کن کسرتا جوڑ جاڑ المی ءِ۔ اوپارے کہ بلوچستان نا شون اکن داوامست ہم کننگا و صوبہ نا شون ءِ تینا مزل گوندنگا ولے او مزل اسکان سرمننگ کن کسرہم المی ئس۔
اوپارے کہ اینو ہراروڈ آک جوڑ مننگ ءُ دا شون نا کسر ءُ۔ گچین انفراسٹرکچر نا بیدس شون نا تغ نیم گڈلو سلک، اینو آن مست ہچ گہس دننگا علاقہ غاتے ٹی روڈ جوڑ کننگ نا سجفتویسس و اگہ سجفیسس ہم تو ہچ اس کننگ کتویسس۔ اوپارے کہ شون اکن اِرا ہیت المی ءِ ، غٹ آن بنداوی گڑا جدید انفراسٹرکچر ءِ، زرکار آتے مواصلات نا قابل بھروستہ نظام نا بیدس پت تننگ مفک، زرکارآک بین الاقوامی منڈی اسکان رسینگ خوارہ، ننے انفراسٹرکچر ءِ مچ آ ملک اٹی تالان کروئی ءِ خاص وڑاٹ ہندن انگا علاقہ غاتیٹی ہراڑے روڈ ساڑی اف و الس ایلو علاقہ غاتیان کاٹوک ءُ۔
وزیراعظم پارے کہ نن اقتدار ءِ سنبھالان تو بلوچستان نا الس ویل آتیان دوچار ئس، اوفتے دہشت گردی و نیزگاری نا مون تروکی ئس، بلوچستان نا الس ءِ مسکوہی ٹی محروم تخنگا، اللہ نا فضل و کرم اٹ دہشت گردآتا مخ انا ملی ءِ پرغانن ۔ وزیراعظم پارے کہ نن نسل آتا محرومی تا خاتمہ ءِ کننگ اُن۔ اوپارے کہ کوہلو ۔سبی نا نیام اٹ اولیکو سڑک پورو مننگ ءِ داکان مست کوہلو۔
سبی نا نیام اٹ 600کلومیٹر نا سفر طے کروئی مسکہ، داسا الس ءِ 600 آخا صرف 174 کلو میٹر نا سفر ءِ طے کروئی تمک۔ اوپارے کہ الس موازنہ کے ہراڑے 600 کلو میٹر و ہراڑے صرف 174کلومیٹر۔ وزیراعظم پارے کہ بلوچستان نا مر مر انگا علاقہ غاتا الس سڑک آتا کمک اٹ اسہ ایلو تون منسلک مریرہ و ہندی پوریا گرو بزغر آتے ہم آسانی مریک و اوتینا مال تے بھلا منڈی تسکان دننگ کیرہ۔
وزیراعظم داوخت آ پارے کہ سبی آن ٹلی 20 کلومیٹر نا سڑک نا جوڑ جاڑ ناہم پڑو ءِ کرے۔ اوپارے کہ کوہلو رکھنی اسکان 80 کلو میٹر نا سڑک ہم بھاز خراب ءِ اودے ہم جوڑ جاڑ کننگے۔ وزیراعظم پارے کہ داوڑ ڈیرہ غازی خان اسکان بھاز جوان سڑک جوڑ مریک و اوڑآن الس ءِ بے پناہ فائدہ مریک۔ اوپارے کہ بلوچستان و پنجاب نا نیام اٹ ہم دا سڑک نا جوڑ جاڑ آن سفر 180 کلومیٹر کم مریک۔ وزیراعظم این ایل سی نا کوشست آتا ستاءِ کرے ہرافک مشکل حالیت آتیٹی دا سڑک نا جوڑ جاڑ ءِ کریر و کاٹم ءِ دلدست آ تخسا کاریم کریر۔ وزیراعظم پارے کہ دا ناقابل فراموش باب اسے۔ اوپارے کہ مشکلات آتا دور گدرینگانے۔ بروک آ دیک مسکوہی نا مقابلہ ٹی جوان مریرہ، نن شون نا سفر نا بناءِ کرینن۔
