پاکستان کشمیر نا اخلاقی ، سفارتی و سیاسی مخ تفی ءِ برجاء تخک، وزیر مملکت انجینئر بلیغ الرحمان

پاکستان کشمیر نا اخلاقی ، سفارتی و سیاسی مخ تفی ءِ برجاء تخک، وزیر مملکت انجینئر بلیغ الرحمان

اسلام آباد (پاکستان نیوز پوائنٹ یکم ستمبر 2016ء) وزیر مملکت انجینئر بلیغ الرحمان پارینے کہ پاکستان کشمیر نا اخلاقی، سفارتی و سیاسی مخ تفی ءِ برجاء تخک۔ ریڈیو پاکستان تون ہیت وگپ کرسا اوپارے کہ مچ آ دنیا دہشت گردی نا پلویڑ اٹی ءِ و پاکستان نیشنل ایکشن پلان آ عملدرآمد نا سوب سرسہبی دوئی کرینے۔ اوپارے کہ بھارت بلوچستان و کشمیر اٹی مروک آ دہشت گردی ٹی اوڑدہ ءِ ۔

انجینئر بلیغ الرحمان پارے کہ بھارت بلوچستان اٹی بدامنی تالان کرسا پاکستان ءِ نزور کننگ خواہک واہم ساڑی آ حکومت نا سرسہب حکمت عملی نا سوب او تینا مقصد اٹی وخت اس ہم سرسہب مفک۔ اوپارے کہ کشمیر اٹی بھارتی بیدادی عروج آٹی ءِ و بھارتی فوج غٹ انا مون آ انسانی حق انا پامالی ءِ کننگ ءِ۔ انجینئر بلیغ الرحمان پارے کہ پاکستان نا کنڈآن جہانی کہول آ کشمیر نا ویل ءِ تالان کننگ نا سوب دنیا نا مون آ بھارت نا مکروہ چہرہ پاش مسنے ہنداخاطران بھارت داوڑکننگ ءِ و منفی پروپیگنڈہ کرسا دنیا نا توجوہ تینا زی آ خلوک دوبہ غاتیان مر کننگ نا کوشست کیک۔

کشمیر نا ویل آ پاکستان نا موقف نا بابت چست کرو ک آ سوج انا ورندی ءِ ترسا اوپارے کہ داکان مست وزیراعظم محمد نواز شریف کیہی وار پارینے کہ نن کشمیر نا سفارتی ، اخلاقی و سیاسی مخ تفی ءِ برجا ء تخنہ۔ اوپارے کہ پاکستان تینا سفارتکار و پارلیمنٹرین آتا کمک اٹ کشمیرنا ویل ءِ مچ آ دنیا ٹی تالان کننگ ءِ۔