اسلام آباد (پاکستان نیوز پوائنٹ یکم ستمبر 2016ء) دفترخارجہ نا ترجمان محمد نفیس زکریا پارینے کہ پاکستان نا دہشت گردی نا برخلاف سرسہبی تے امریکہ تون اوار مچ آدنیا اوفتا ستاءِ کننگءِ ۔ ریڈیو پاکستان تون ہیت وگپ کرسا اوپارے کہ پاکستان مسلم لیگ (ن) نا ساڑی آ حکومت و سیکورٹی فورسز آتا سرسہب حکمت عملی آن دہشت گردی ٹی کمتی واقع مسنے۔ اوپارے کہ مچ آ دنیا ٹی دہشت گردی آن غٹ آن زیات زہمی مروک آ ملک پاکستان ءِ و دہشت گردی ءِ خلوص نیت اٹ چٹفنگ نا کوشست، سیکورٹی فورسزآتا قربانی تا سوب شدت پسندی ٹی کمتی واقع مسنے۔
اوپارے کہ دا سرسہبی تا جہانی کہو ل آ اعتراف کننگ انگ ءِ۔ اوپارے کہ ننے معلوم ءِ کہ پاکستان اٹی مروک آ دہشت گردی نا پداٹ بھارت تون اوار ہراہرا ملک اوڑدہ ءِ۔ دفترخارجہ نا ترجمان پارے کہ کل بھوشن یادیو نا دزگیری و اونا بیان آتیان پد یخین پکا مسنے کہ بلوچستان ، کراچی و ملک انا ایلو علاقہ غاتیٹی بھارت فنڈنگ و شدت پسندی اٹی اوڑدہ ءِ۔ اوپارے کہ بھارت نا دورہ غا ساڑی امریکی سیکرٹری خارجہ جان کیری ہم دہشت گردی نا برخلاف پاکستان نا سرسہبی تے خوش آئند گوندانے۔
داکان مست پاکستان نا دورہ غا بروک آ جان مکین ہم میران شاہ نا دورہ غان پد تینا اسہ آرٹیکل اسے ٹی نوشتہ کرینے کہ پاکستان نا حالیت آک مست آنبار افس اودہشت گردی نا برخلاف بھلو سرسہبی اس دوئی کرینے۔ اوپارے کہ دنیا غا دا پاش مسنے کہ ہرا ملک دہشت گردی نا برخلاف شور کننگ ءِ و تینٹ شدت پسندی ءِ تہو تننگ اٹی اوڑدہ ءِ۔
