اسلام آباد(پاکستان نیوزپوائنٹ22نومبر2017ء) درنیامی ایشیائی ریاست قزاخستان ءِ ھال ء ُ وانگء ُ زانگءِ زانت کارانی 7باسکی ڈلءَ چارشمبے ءِ روچءَ راجی ھال رسانکی ادارگ ایسوسی ایٹڈ پریس آف پاکستان ءِ ہیڈ کوارٹرز ء ِ ترء ُ تا ب کتگ۔
ڈل ءِ تہا باسکاں دوھیں ملک آنی درنیامءَ بازیں پڑ ھاس وانگء ُ زانگ ء ُ ھال درءِ تہا دونیمگی کمک ءَ را گیش کنگءِ سرءَ ھاسیں ھدوناکی پدر کتگ۔ ڈلءِ تہا قزاخستان ءِ روہتاکء ُ نیوز ایجنسی ءَ گوں بندوکیں صحافی ء ُ وانگء ُ زانگ ءِ زانت کار ھوار بوتگ اَنت۔ ڈل ءِ تہا قزاخ میگزین ءِ چیف ایڈیٹر غابط مولد مرادودف، قزاخستان ءِ راجی ھال رسانکی ادارگءِ نمائندگ آرنوررحیم بیخوف، الفارابی مزن شاھ آمید گسءِ ڈین آف اورنٹیل سٹیڈیز ڈاکٹر بختیار پالتورے ، یوریشئین نیشنل مزن شاہ دربرجاھ ءِ پروفیسر آف اورئینٹل سٹڈیزڈاکٹرسمال تولیبائیوفء ُ دگہ ھوار اَنت۔
پاکستان ءَ قزاخستان ءِ سفارت خانہ ءِ سیکنڈ سیکرٹری نورزینس آتی بائیوف ھم ڈل ءِ ھمراھ بوتگ۔ ڈل ءِ باسکاں ” اے پی پی“ ہیڈ کوارٹرز ءِ دراھیں پڑآنی ترء ُ تاب کتگ، ” ا ے پی پی“ ءِ کارءِ وڈء ُ پیمءِ تہا بازیں ھدوناکی درشان کنگ بوتگ ء ُ اے ھوالگءَ بازیں جستء ُ پُرسے کنگ بوتگ۔ ڈلءِ باسکاں منیجنگ ڈائریکٹر اے پی پی مسعود ملک ء ُ ڈائریکٹر آنی گوما باز جوانیں دوستی ء ُ وشیں تبء ُ میلءِ گوما ” اے پی پی “ ءِ نیمگءَ چہ ھالانی شنگ کنگ ، ٹھینگء ُ جوڈ کنگء ُ صارفین ءَ تاں سرکنگءِ ھوالگءَ گپ ء ُ تران کتگ۔
اے ترء ُ تاب ءِ یک دگہ مولء ُ مرادے پاکستان ء ُ قزاخستان ءِ درنیامءَ بازیں پڑانی تہا کمک گیش کنگءَ ھوار دمگی ء ُ میاں اوستمانی رپکءَ اے ھالانی سرءَ دلگوشی کنگ بوتگ کہ ھندی ، دمگی ء ُ میاں اوستمانی ھالانی پُشدرءَ چہ باز ارزشت داراَنت۔ ڈل ءِ باسکاں پاکستانء ُ قزاخستان ءِ درنیامءَ اُلسی ء ُ دودء ُربیدگی نزیکیاناں گیش کنگءِ ضلورت ءِ سرءَ زور پِرداتگ۔
آئیءَ ھال رسانکی ادارگءِ وسیلگءَ پاکستانی ھال در ءِ تہا وسطی ایشیائی ءِ ھوالگءَ بازیں معلومداری ءَ را گیش کنگءِ ضلورتءِ سرءَ زور پِرداتگ۔ ” اے پی پی “ ءِ ڈائریکٹر فارن اینڈ ڈپلومیٹک نیوزءَ ڈلءِ باسکاناں ”اے پی پی“ ءِ کوریج ء ُ کارءِ وڈء ُ پیم ءِ ھوالگءَ شونشت داتگ۔ ڈائریکٹر کوارڈی نیشن اکرم ملک ھم اے موھءِ سرءَ ساڑی بوتگ۔ ڈل ءَ را ھال دیئگ بوتگ کہ ”اے پی پی“ ء ُ قزاخستان ءِ راجی ھال رسانکی ایجنسی ءِ درنیامءَ ھالانی یکے دومی ءَ را سرکنگءِ ھوالگءَ ” اے پی پی“ ءَ را قزاخستان ءِ راجی ھال رسانکی ایجنسی ءِ پسوءِ ودار اِنت۔
ڈل ءَ ھال داتگ کہ ” اے پی پی“ ءِ 34سرکاری ھال رسانکی ادارگ آنی گوما ھمیں وڈءِ منء ُ گر اَست اَنت۔ ” اے پی پی“ ءِ منیجنگ ڈائریکٹر مسعود ملک ءَ ڈلءَ راھال داتگ کہ ” اے پی پی“ ملک ءِ تہاھالانی شنگ کنگءِ درساں چہ مستریں نیٹ ورک اِنت، ” اے پی پی“ ءَ چہ یکیں وھدءَ اُردو، ، انگریزی،سندھی،بلوچی،براہوی،پشتو، سرائیکیء ُ عربی زبانءَ ھال شنگ بنت کشمیری ء ُ چینی زبانءِ تہا ھال زوت شنگ کنگ بنت۔
آئیءَ ھال داتگ کہ اے ءَ امریکہ ، برطانیہ، چین ء ُ بھارتءِ تہا ”اے پی پی“ ءِ نمائندگ است اَنت وھدے کہ بازیں بنجاھی حکومت آنی تہا ”اے پی پی“ ءِ سٹرنگرز کار کنگءَ اَنت، زوت ترکی، دبئی ، سری لنکا ء ُ روس ءِ تہا جھگیر دارگ بنت۔ آئیءَ ھال داتگ کہ ملک ءِ تہا ” اے پی پی“ ءِ 09بیوروکارگس ء ُ155ضلع آنی تہا نمائندگ کار کنگءَ اَنت۔ ”اے پی پی“یکیں ھال در ایجنسی اِنت کہ بازیں نیوز چینل آناں نیوز فوٹیج دنت، 2007ءَ وڈیونیوز سروس ءِ بندات ءَ تاں بہ گر تاں انو” اے پی پی “ ءَ بازیں چینل آناں 89ہزار نیوز فوٹیج داتگ، ایشی ءَ ابید وی این ایس سروس بازیں چینل آناں 721دستاویزی تامور ھم داتگ۔
آئیءَ گشتگ کہ”اے پی پی“ ءَ چہ بازیں چیمبر ء ُ بیپاری ادارگ آناں بیپاری ء ُ اقتصادی کارانی ھوالگءَ ھالانی پھجارینگءِ کار ھم جاری اِنت، ادارگ ءِ گورءَ وتی ڈی ایس این جی اَست کہ ھالاں تچکءَ تچک شنگ کنگءِ وسیلگ اِنت، ”اے پی پی“ ءَ انوں پائلٹ پراجیکٹ ءِ ردءَ وتی یک ویب ٹی وی بندات کتگ۔ ڈلءَ را ھال دیئگ بوتگ کہ گوستگیں سال ”اے پی پی“ ء َ وتی سوشل میڈیا سیل جوڈ کتگء ُ تاں انوں ٹوئٹر ء ُ فیس بک ءِ سرءَ سوشل میڈیا ءِ نیمگءَ چہ 07ہزار ءَ چہ گیشءِ ھال شنگ بوتگ اَنت۔
