سینیٹ نا ذیلی کمیٹی منتقلی اختیارات نا دیوان، 18می ترمیم آن گڈ اختیارات آتا صوبہ غاتے گدریفنگ، بنجاء آن 17 وزارت آتا صوبہ غاتے گدریفنگ نا معاملہ غاتا جاچ

سینیٹ نا ذیلی کمیٹی منتقلی اختیارات نا دیوان، 18می ترمیم آن گڈ اختیارات آتا صوبہ غاتے گدریفنگ، بنجاء آن 17 وزارت آتا صوبہ غاتے گدریفنگ نا معاملہ غاتا جاچ

کوئٹہ۔(پاکستان نیوز پوائنٹ 31اگست 2016ء) سینیٹ نا ذیلی کمیٹی برائے منتقلی اختیارات نا دیوان چیئرمین سینیٹر میر کبیر احمد محمد شہی نا کماشی ٹی کوئٹہ ٹی مس۔ دیوان اٹی 18 می ترمیم آن گڈ اختیارات آتا صوبہ غاتے گدریفنگ و بنجاآن 17 وزارت آتا صوبہ غاتے پورو گدریفنگ نا معاملہ غاتا جاچ ہلنگا۔ دیوان آن تران کرسا چیئرمین کمیٹی میر کبیر احمد محمد شہی پارے کہ ہژدہ می ترمیم نا منظوری آن گڈ اختیارات آتا بنجاآن صوبہ غاتے گدریفنگ ءِ باوری جوڑ کننگ کن المی ءِ کہ صوبہ غاک تینٹ ہم تینا کاریم نا کچ اٹی ودکی ءِ باوری جوڑ کیر۔

اوپارے کہ ہژدہ می ترمیم نا شق آتیا عملدرآمد آن چنکا صوبہ غاتے مالی و انتظامی معاملہ غاتیٹی یخینی وڑاٹ گچینی بریک۔ سینیٹر میر کبیر احمد محمد شہی مستی پارے کہ ہژدہ می ترمیم آ من و عن عملدرآمد و تاحال ترمیم آ عملدرآمد کپننگ نا بابت آن غٹ صوبہ غاتا گڑتی تے معلوم کننگک ہرافتے مون آ تخسا سلاہ مرتب کننگک۔ میر کبیر احمد محمد شہی بیوروکریسی تون پارے کہ او بنجاء آن اختیارات صوبہ غاتے گدریفنگ کن تینا کڑد ءِ ادا کے تانکہ صوبہ اوفتا بھرم آتیان استفادہ کننگ کے۔

اوپارے کہ کمیٹی ہر چار آ صوبہ غاتا دورہ ءِ کیک و بنجاء آن صوبہ غاتے اختیارات آتا گدریفنگ نا بارواٹی تعلقدار کمامدار آتون خیال آتا درشانی ءِ کیک۔ کمیٹی سلاہ تس کہ بنجائی حکومت ءِ مرے کہ او صوبہ غاتے اختیارات آتا گدریفنگ ءِ باوری جوڑ کننگ کن گام گیج کے و دا چرجوئی ٹی بروک آ اڑاند آتے مر کے۔ سینیٹر کبیر احمد محمد شہی پارے کہ ہژدہ می ترمیم آن گڈ ہفدہ وزارت آتا صوبہ غاتے اختیارات آتا پورو گدریفنگ نا بابت آن پین کاریم کروئی مریک۔

او پارے کہ آئین نا آرٹیکل 172-3 نا رداٹ صوبہ سے آن کشوک آ معدنی وسیلہ غاتا آمدنی نا پنجا درسد بنجا و پنجا درسد صوبہ ءِ بایدے ملے۔ داکان مست دیوان اٹی سانحہ سول ہسپتال کوئٹہ ٹی شہید مروک آتا روح انا ثواب کن فاتحہ خوانی ہم کننگا۔ دیوان اٹی سینیٹر تاج حیدر، سینیٹر عطاء الرحمان ، سینیٹر سعید الحسن مندوخیل، سینیٹر نواب زادہ سیف اللہ مگسی، ڈاکٹر اسحاق بلوچ، سیکرٹری سینیٹ کمیٹی رابعہ انور شرکت کریر۔ کمیٹی نا دیوان پگہ ہم برجا سلک۔