اسلام آباد(پاکستان نیوز پوائنٹ 31اگست 2016ء) بنجائی وزیر خزانہ سینیٹر اسحاق ڈار پارینے کہ بنجائی کابینہ ستمبر نا تو اکن پٹرولیم مصنوعات نا ساڑی آ نرخ آتے برقرار تخنگ نا فیصلہ کرینے، ٹیکس امور اٹی تین پہ تینی انتظامی کمکاری نا بارواٹی 14ستمبر 2016ء آ پیرس اٹی او ای سی ڈی نارداٹ کثیر الطرفہ کنونشن آ دستخط کننگ نا منظوری تننگا، بنجائی کابینہ 29 اگست 2016ء آ مروک آ اقتصادی رابطہ کمیٹی نا فیصلہ غاتا ہم توثیق ءِ کرینے، کابینہ ٹیکس کانود ترمیمی آرڈیننس 2016ء و پٹرولیم مصنوعات آتیا سیلز ٹیکس نا تعین نا ہم منظوری تسنے۔
او چارشنبے آ بنجائی کابینہ نا دیوان آن گڈ میڈیا ءِ بریفنگ تسکہ۔ بنجائی وزیر اطلاعات و نشریات سینیٹر پرویز رشید ہم داوخت آ ساڑی ئس۔ بنجائی وزیر خزانہ پارے کہ کابینہ وزیراعظم نا پائیدار شونداری ہدف آتا پروگرام ، دوہرے ٹیکس آن گریز و آمدنی آ ٹیکس آتا بابت مالیاتی دُزی نا توننگ کن پاکستان و چین نا نیام اٹ معاہدہ غا دستخط کن مسٹ می پروٹوکول و بنائی مسودہ غا دستخط نا ہم منظوری تسنے۔
آمدنی ٹیکس آتا بابت آن دوہرے ٹیکس آن گریز کن پاکستان و سوئٹزلینڈ نا نیام اٹ کنونشن آ نظرثانی و بنائی مسودہ غا دستخط کننگ نا ہم منظوری تننگا۔ کابینہ ٹیکس کانود ترمیمی آرڈیننس 2016ء و پٹرولیم مصنوعات آتیا سیلز ٹیکس انا تعین نا ہم منظوری ءِ تس۔ کابینہ ری سٹرکچرنگ نا بارواٹی کابینہ کمیٹی نا 13دسمبر 2013ء و جولائی 2014ء آ اڈ ہلوک آ دیوان آتیٹی کروک آ فیصلہ و کابینہ کمیٹی برائے نجکاری نا 26نومبر، 9 دسمبر و 12دسمبر 2014ء آ اڈہلوک دیوان آتیٹی اونا فیصلہ غاتا ہم منظوری ءِ تس ، اوکان بیدس کابینہ 10 اگست، 11 اگست، 17 ستمبر و 2اکتوبر 2015ء آ کابینہ کمیٹی نجکاری نا دیوان آتیٹی کروک آ فیصلہ غاتا ہم توثیق ءِ کرے۔
کابینہ نا دیوان اٹی کروک آ ایلو فیصلہ غاتیٹی ٹیکس ڈائریکٹری اشاعت، سیلز ٹیکس ایکٹ1990 ء نا شق 2 انا ذیلی شق(22اے ) نا رداٹ نوٹیفکیشن و انکم ٹیکس آرڈیننس 2001ء نا بارواٹی شق 236پی نا رداٹ نان فائلرز آتے کن کم کروک ود ہولڈنگ ٹیکس کچ انا تاریخ اٹی 31 دسمبر 2016ء اسکان ودیکی اوارے۔ اوپارے کہ کابینہ 14 ستمبر 2016ء آ پیرس اٹی او ای سی ڈی سیکرٹریٹ اٹی ٹیکس امور اٹی تین پہ تینی انتظامی کمکاری نا بارواٹی کثیر الطرفہ کنونشن آ ہم دستخط نا منظوری و 29 اگست 2016ء آ اقتصادی رابطہ کمیٹی نا فیصلہ غاتا توثیق ءِ کرے۔
سینیٹر اسحاق ڈار پارے کہ پاکستان کمیشن ااف انکوائری بل 2016ء ، 2 ستمبر آ قومی اسمبلی ٹی پیش کننگک۔ دا بل پٹ وپولی کمیشن ءِ بااختیار جوڑ کننگ کن اتنگ انگ ءِ۔ داچرجوئی ٹی اپوزیشن نا کنڈآن سلاہ تا خیر مقدم ءِ کننگک۔ بنجائی وزیر پارے کہ بنجائی کابینہ یکم ستمبر آن پٹرولیم مصنوعات آتا نرخ آتے برقرار تخنگ نا فیصلہ کرینے۔ حکومت تدوک آ 5 توآن پٹرولیم نا نرخ آتے مستحکم تخانے۔
وزارت خزانہ داچرجوئی ٹی تدینگوک آ اِرا تو انا وخت 10 ارب روپئی نا بھاریم ءِ برداشت کرینے۔ اوپارے کہ راج انا نیزگار و حقدار تپہ غاتے ملک مرض آتیان بچفنگ کن جان جوڑی نا پروگرام آ تعلقدار وزارت ءِ عملدرآمد ترند کننگ و اونا دنگ ءِ گیشترکننگ نا پارت ہم جاری کننگانے۔ اسحاق ڈار پارے کہ نان فائلرز آتے کن ود ہولڈنگ ٹیکس انا 0.4 درسد نا کچ آن نفاذ نا مدت 31 دسمبر اسکان ودفنگانے۔
ہنداوڑ پارلیمنٹرینز ٹیکس ڈائریکٹری و جنرل ٹیکس ڈائریکٹری شینک کننگ نا ہم منظوری تننگانے۔ ایف بی آر 2015ء نا ٹیکس ڈائریکٹریز جاری کیک اوڑآ اِرا مسہ ہفتہ ٹی کاریم پورو مریک۔ اسحاق ڈار پارے کہ بنجائی کابینہ سوئٹزر لینڈ تون ہڑتوم آ کنڈآتا معاہدہ نا موکل تسنے دا چرجوئی ٹی وزارت خزانہ تینا وڑاٹ کاریم کرینے۔ سوئٹزر لینڈ نا کنڈآن شرائط عائد کننگاسس واہم ننا ٹیم نا کوشست آتیان دا کنڈا اہم پیش رفت اس مسنے۔
نن تینا کاریم ءِ پورو کرینن داسا سوئس کمامدارآک تینا ملکی کانود نا رداٹ ضابطہ نا کارروائی کروئی ءِ۔ اوپارے کہ سوئٹزر لینڈ تون ہڑتوم آ کنڈآتا معاہدہ غان آرگنائزیشن آف اکنامک کو آپریشن اینڈ ڈویلپمنٹ (او ای سی ڈی ) نا کثیر الجہتی معاہدہ بھاز جوان ءِ و نن دا چرجوئی ٹی کوشست کننگ اُن۔ اوپارے کہ اوگرا وزارت پٹرولیم نا کمک اٹ نرخ آتا بابت آن سمری وزارت خزانہ ءِ راہی کیک ہرا وزارت خزانہ منظوری کن وزیراعظم ءِ پیش کیک۔
اوپارے کہ اقتصادی رابطہ کمیٹی نا مستین سارک فیصلہ غاتا پورو فہرست توثیق کن کابینہ ٹی پیش کننگک۔ اسہ پین سوج اسے نا ورندی ٹی وزیر خزانہ پارے کہ انکوائری کمیشن ایکٹ 1956 ء نا جاگہ پاکستان کمیشن آف انکوائری بل 2016ء تیار کننگانے ہرا بااختیار مریک۔ دا ملک انا گرج ءِ۔ اوپارے کہ بنجائی کابینہ 5 و 10 روپئی نا سکہ غاتا ہم خصوصی منظوری ءِ تسنے۔ اوپارے کہ 5روپئی نا پوسکنا ڈیزائن نا 155ملین سکہ وخت اس کہ 10 روپئی نا سکہ ہم زیر عمل ءِ و داوخت اسکان 10 ملین سکہ تیار کننگانو۔
