وزیراعلیٰ گلگت بلتستان حافظ حفیظ الرحمان نا گلگت اٹی سی پیک نا بابت اِرا دے ئی سیمینار نا افتتاحی سیشن آن تران

وزیراعلیٰ گلگت بلتستان حافظ حفیظ الرحمان نا گلگت اٹی سی پیک نا بابت اِرا دے ئی سیمینار نا افتتاحی سیشن آن تران

گلگت۔(پاکستان نیوز پوائنٹ 31اگست 2016ء) وزیراعلیٰ گلگت بلتستان حافظ حفیظ الرحمان پارینے کہ قوم پاک چین اقتصادی راہداری نا برخلاف سازش آتے بے سہب جوڑ کننگ کن پرعزم ءِ، اقتصادی راہداری مچ آڈیہہ کن گیم چینجر اسے نا حیثیت تخک۔ داہیت ءِ او چارشنبے آ داڑے پاک چین اقتصادی راہداری نا بابت اِرادے ئی سیمینار نا افتتاحی سیشن آن تران کرسا پارے۔

اوپارے کہ اقتصادی راہداری نا نتیجہ ٹی گلگت بلتستان اٹی زند انا کیہی بشخ بشمول سیل و سوات آ بے کچ جوان زئم تمک و ہندا ڈیہہ ٹی شون و شونہالی نا پوسکنا دور انا بناء مریک۔ اوپارے کہ گلگت بلتستان نا الس دا ڈٹ انا اہمیت آن جوان وڑاٹ آگاہ ءِ۔ و ہنداسوب ءِ کہ گلگت نا غٹ سیاسی جماعت آک دا ڈٹ انا مخ تفی ءِ کننگ ءُ۔ اوملک ءِ درست اقتصادی سمت اٹی روان کننگ کن وزیراعظم محمد نواز شریف نا گام گیج آتا ستاءِ کرے و پارے کہ بنجائی حکومت نا پالیسی تا نتیجہ ٹی معیشت نا غٹ بشخ آتیا گچین زئم تمانے و ملک شون نا کسر آ روانءِ۔

حافظ حفیظ الرحمان پارے کہ بھارتی وزیراعظم نریندر مودی سی پیک نا جوڑ جاڑ آ فریشان ءِ، گلگت بلتستان نا الس 1947ء ٹی ہم نریندر مودی نا آقا تا برخلاف تینا رائے نا درشانی ءِ کریسس، ساڑی ہی ٹی بھارتی وزیراعظم نا بیان ءِ گلگت و بلتستان نا الس مسترد کرینے۔ اوپارے کہ بنجائی حکومت نا کمک و کیہی سیکورٹی ایجنسی تا گام گیج آتا نتیجہ ٹی گلگت بلتستان اٹی امن و ایمنی نا حالیت آتیٹی نمان گچینی بسنے۔