اسلام آباد(پاکستان نیوزپوائنٹ15نومبر2017ء) مسکوہی وزیراعظم محمد نواز شریف پارینے کہ احتساب عدالت ءِ پین جاگہ سے آن کنٹرول کننگ انگ ءِ، ننے سزا تتوس بلکن ترفنگ انگ ءِ وخت اس کہ عدالت آتا دہرامعیار ءِ و نن دادہرہ معیار نا برخلاف جہد کننگ اُن۔ احتساب عدالت اٹ پیشی آن پد ہموڑے ساڑی میڈیا تون غیر رسمی ہیت وگپ کرسا نواز شریف پارے کہ عدالت آتا دہرا معیار زوت تینا ایسری انجام اسکان سرمریک۔
اونا پاننگ ئس کہ احتساب ءِ پین جاگہ سے آن کنٹرول کننگ انگ ءِ و ہراقصور ءِ نن کتنون انت اونا ہم ننے آن بیرہ ءِ ہلنگ انگ ءِ۔ عدالتی فیصلہ ٹی ہندن ءُ کلہو اس ئس کہ نواز شریف ءِ ہربہاء آ سزاتروئی ءِ ولے سزا تفننگ ءُ بلکن ترفنگ انگ ءِ۔ نواز شریف نا پاننگ ئس کہ عدالت اٹ ننے آن ننا سیاسی مخالف کون آ سوج آتے ہریفنگا، عدالتی فیصلہ ٹی ہندن ءُ ریمارکس ئسر دُن کہ ننا سیاسی مخالف آک ایترہ۔
پی ٹی آئی نا سروک عمران خان نا ضمانت منظور مننگ نا بابت اسہ سوج اسے آ اونا پاننگ ئس کہ کنا مقدمہ ٹی پین و وخت اس کہ ایلو تا مقدمہ غاتیٹی پین ضابطہ ءُ، نن دا دہرامعیار نا چٹفنگ کن جہد ءِ برجاتخنہ، دااحتساب آخا انتقام اسے و دانا باوجود ہم نن عدالت آتا شرف ءِ کینہ۔ مسکوہی وزیراعظم پارے کہ 1999ء ٹی ہم جہاز ہائی جیکنگ نا دروغ کیس اٹی اودے سزا ترفنگاسس۔ داوخت آ ہم کنے پھسائفنگا و اینو ہم ہمو معاملہ ءِ پدی اتنگ انگ ءِ۔
