کراچی(پاکستان نیوزپوائنٹ15نومبر2017ء) صدر مملکت ممنون حسین پارینے کہ امریکہ نا بھارت ءِ ڈیہہ ٹی اسہ بھلو واک اسے نا وڑاٹ مون آ اتنگ نا کوشست آن ڈیہہ نا امن خلیس اٹ تمنگ کیک، کشمیر نا ویل ڈیہہ نا امن اٹی غٹ آن بھلا اڑاند ءِ و دادے ایسر کننگ آن بیدس ڈیہہ ٹی امن اسہ تغ اسے، علاقائی امن کن المی ءِ غٹ ایسر نا چاری ویل آتے ہیت وگپ انا کمک اٹ ایسر کننگے۔
اوداہیت ءِ چارشنبے نادے داڑے کراچی انسٹی ٹیوٹ آف انٹرنیشنل افیئرز نا کنڈآن ”سویلی ایشیاٹی امن“ نا سرحال آ اڈ ہلوک آ کانفرنس آن تران کرسا پارے ہراٹی چیئرپرسن انسٹی ٹیوٹ آف انٹرنیشنل افیئرز گودی ڈاکٹر معصومہ حسن ہم تران کرے۔ ایوان صدر نا کنڈآن جاری پریس ریلیز نا رداٹ صدر مملکت پارے کہ سویلی ایشیاداوخت آ بھاز انگا جھیڑہ و تنکی تا گواچی ءِ و چندی ایسر نا چاری سیاسی و جغرافیائی ویل آتا سوب ڈیہہ نا امن داؤ آ لگانے و داویل آتے جہانی حالیت، خاص وڑاٹ سردجنگ ، اوغانستان نا بگڑینگوک آ حالیت و دہشت گردی نا معاملہ غاک پین ویل ویچڑ کرینو۔
اوپارے کہ کیہی دہائی آن جاری دا الم آک ڈیہہ نا سیاسی ، راجی و اقتصادی معاملہ غاتون اوار سلامتی نا معاملہ غاتیا بھلو زہم اس مرتب کرینو۔ صدر مملکت پارے کہ پاکستان و بھارت نا ایٹمی واک جوڑ مننگ آن پد سویلی ایشیانا دفاعی منظر نامہ پورو وڑاٹ بدل مسنے و داعہد اٹی ڈیہہ نا حالیت مسہ کہول یعنی داخلی ، علاقائی و جہانی الم آتا سوب زہمی مننگ ءِ ہراڑآ چکار کننگ نا سخت گرج ءِ۔ صدر مملکت پارے کہ جموں وکشمیر ، سرکریک و سیاچن کون آ ویل آک سویلی ایشا ٹی سوگوی نا کسر اٹی اسہ بھلو اڑاند اسے ءُ ۔ نائن الیون نا شکست آن پد اوغانستان نا حالیت آک علاقائی سلامتی نا ویل آتیٹی پین ودکی کرینو۔
