اسلام آباد(پاکستان نیوزپوائنٹ14نومبر2017ء) پاک بحریہ نا سروک ایڈمرل ظفرمحمود عباسی تون فرسٹ سی لارڈ و برطانیہ نا رائل بحریہ نا سروک سرفلپ جانز اوڑدہی کرے ہراٹی کسبی معاملہ و ہڑتوم آ ملک آتا بحری فوج انا نیام اٹ کمکاری نا چندی بشخ آتیا خیال آتا درشانی ءِ کننگا۔ شرفدار آ مہمان ءِ ڈیہہ نا میری ٹائم حالیت آتیٹی پاک بحریہ نا کڑد وبحر ہند اٹی پاک بحریہ نا آپریشنل تیاری تیا سرجم بریفنگ ہم تننگا۔
پاک بحریہ نا ترجمان نا رداٹ دوشنبے نادے فرسٹ سی لارڈ و برطانیہ نا رائل بحریہ نا سروک ایڈمرل سرفلپ جانز پاک بحریہ ہیڈکوارٹر نا دورہ ءِ کرے ہراڑے پاک بحریہ نا سروک ایڈمرل ظفرمحمود عباسی فرسٹ سی لارڈ و برطانیہ نا رائل بحریہ نا سروک ءِ بخیر کرے۔ پاک بحریہ نا چاق و چوبند دستہ شرفدار آ مہمان ءِ سلامی پیش کرے۔ سلامی آن پد شرفدار آ مہمان نا نیول ہیڈ کوارٹر اٹی تعینات پرنسپل اسٹاف آفیسرز آتون درستی راستی ءِ کرفنگا۔
اوکان پد ، ایڈمرل سرفلپ جانز پاک بحریہ نا سروک اتون اوڑدہی کرے۔ برطانیہ نا رائل بحریہ نا سروک پاک بحریہ نا شہید آتے خراج تحسین پیش کننگ کن نیول ہیڈکوارٹر اٹی اڈ ہلوک یات گار شہداء آ پھل آتا چادر اس شاغا۔ ایڈمرل سرفلپ جانز تینا دورہ نا ارٹ میکو مرحلہ ٹی لاہور و کراچی ٹی نیول فیلڈ کمانڈز اتون اوڑدہی کیک و پاکستان نیوی وار کالج لاہور اٹی لیکچر ہم ایتک۔ برطانیہ نا رائل بحریہ نا سروک نا دا دورہ ہڑتوم آ ملک آتا بحری فوج انا نیام اٹ تین پہ تینی تعلقداری تیٹی سوگوی نا سوب جوڑمریک۔
