اسلام آباد(پاکستان نیوزپوائنٹ14نومبر2017ء) صدر مملکت ممنون حسین پارینے کہ پاکستان سائنس و ٹیکنالوجی ، صنعت وحرفت و اقتصادی شونداری نا پوسکن آ دور اٹی گام تخانے، پوسکن آ دورانا گرج آتا پوروی کن سائنسدان و محقق آک تینا پبی توانائی تے خڑچ کیر، خلائی پٹ وپول نا بشخ داچرجوئی ٹی بے کچ اہم ءِ۔ اوداہیت ءِ سے شنبے نادے انسٹی ٹیوٹ آف سپیس ٹیکنالوجی (آئی ایس ٹی ) ٹی پنچ می جہانی ایروسپیس سائنس و ٹیکنالوجی کانفرنس نا بنائی دود آن تران کرسا پارے۔
داوخت آ کانفرنس نا چیئرمین و آئی ایس ٹی نا وائس چانسلر انجینئر عمران رحمان و آئی ایس ٹی نا ڈین ڈاکٹر اقبال مسعود ہم خیال آتا درشانی ءِ کرے۔ صدر مملکت پارے کہ ننا تعلیمی و پٹ وپولی ادارہ غاک بے مٹ کارکردگی نشان تسنو ولے داسکان بھاز انگاکاریم تے کروئی ءِ ۔ اوپارے کہ گدرینگوک آ 2عشرہ ٹی خلائی پٹ وپول انا بشخ اٹی ریکارڈ شونداری مسنے و دنیا نا منہ خاص شون ہلوک ملک آک آخا بلکن ننا گڑاس ہمسایہ ملک آک ہم داپڑاٹی بھاز مون آ پیش تمانو۔
سائبر ٹیکنالوجی نا کمک اٹ معمولات زند آخا بلکن کاروباری وڑوڈول و ہن و بر نا ذریعہ ٹی ہم بدلی بننگ ءِ۔ صدر مملکت پارے کہ داچیلنج آتون مون تننگ کن سائنس و ٹیکنالوجی نا بشخ نا کڑد اہم ءِ، ہنداخاطرآن المی ءِ کہ آئی ایس ٹی و سپارکو تون اوار ایلو غٹ ادارہ غاک تینا پٹ وپولی ڈٹ آتیٹی ودکی ودی کیر۔ اوپارے کہ پاکستانی سائنس دان و محقق آک تینا زی آ شاندار کارنامہ میسر انجام تسنو۔ صدر مملکت پارے کہ انسٹی ٹیوٹ آف سپیس ٹیکنالوجی قومی جامعہ غاتیٹی اہم ءُ ہند اس تخک۔ اواومیت ظاہر کرے کہ دا ادارہ ایلو ملک و ادارہ غاتا کمک اٹ ڈٹ بناء کرسا ملک انا شونداری ٹی تینا کڑد ءِ ادا کیک۔
