اسلام آباد(پاکستان نیوز پوائنٹ 30اگست 2016ء) پاکستان پیپلزپارٹی نا چیئرمین بلاول بھٹو زرداری مچ آ سندھ اٹی گچین مروک آ پوسکنا میئرز، ڈپٹی میئرز و چیئرمین آتے مبارکبادی تس ہراک سے شنبے آ تینا عہدہ غاتا سوغند ہرفیر۔ تینا تہنیتی کلہو اٹی بلاول بھٹو زرداری پارے کہ بلدیاتی حکومت نا تاریخ اٹی اینو اسہ پوسکن ءُ دور اسے نا بنا مننگ ءِ و پوسکنا بلدیاتی نمائندہ غاتے تینا علاقہ غاتا الس نا خذمت نا موقع دو بسنے ہرادے صفائی ستھرائی آن ہلیس خلقت آتا بنداوی گرج آتا فراوانی کن زمہ واری ادا کروئی ءِ۔
اوپارے کہ سندھ اٹی گچین مروک آ 200 آن زیات میئرز و ڈپٹی میئرز و چیئرمین آتے الس نا است انا خلوص اتون خذمت کروئی ءِ۔ اوپارے کہ خوشی نا ہیت اسے کہ اقلیت آتا 18 باسک آتے ہم چیئرمین و نائب چیئرمین نا وڑاٹ گچین کننگا ہرا بلدیاتی حکومت و جمہوری نظام کن اسہ پین اعزاز اسے۔
