اسلام آباد(پاکستان نیوز پوائنٹ 30اگست 2016ء) مسکوہی بنجائی وزیر، قائد بلوچ رابطہ اتفاق تحریک (برت)پرنس محی الدین بلوچ پارینے کہ بلوچ محب وطن ءُ او درملکی پروپیگنڈہ غا پاور کپسہ۔ دابابت آن بھارتی وزیراعظم مودی نا بیان بے معنہ و غلط ءِ۔ بلوچستان نا الس محب وطن ءُ و مودی ءِ بلوچستان تون ہچ ءُ مخ تفی اس اف نہ اونا سوج ودی مریک۔ اوپارے کہ غٹ سیاسی جماعت آک یکجا مرسا ملک انا شون و سلامتی کن کاریم کیر۔
ملک ءِ داوخت آ ہم آہنگی و ایلمی نا گرج ءِ۔ ملک اٹی دہشت گردی نا خاتمہ و امن نا اڈتننگ کن بلوچ الس بے لوث خذمت آتے کن تیار ءُ۔ اوپارے کہ داوخت آ پاکستانی فوج مثالی خذمت سرانجام تننگ ءِ و حتی الامکان دہشت گردی ءِ چٹفنہ۔ پرنس محی الدین بلوچ پارے کہ بلوچستان نا بارواٹی منفی بیانات بلوچستان نا الس کن قابل قبول افس او تینا ڈیہہ نا رکھ ءِ جوانی اٹ چارہ و لالچ نا عوض تینا کاٹم ءِ شیف کپسہ۔ بلوچستان نا ویل آتے اولیت تننگ و گوادر نا شون اٹی بلوچ آتے زیات آن زیات نمائندگی تننگ و بے روزگار ورناتے روزگار فراوان کرسا اوفتا مالی ویل آتے ایسر کننگ نا گرج ءِ۔
