کوئٹہ(پاکستان نیوز پوائنٹ 30اگست 2016ء) کمشنر سبی ڈویژن غلام علی بلوچ پارینے کہ سلہہ بٹوک آ فراری تے قومی دنگ اٹی اوار کننگ کن ایف سی و سیکورٹی فورسزآتا کارکڑد ستاء کڑزک، امن نا اڈتننگ کن اواری اٹ کڑد ادا کروئی مریک، سلہہ بٹسا ملک اکن خذمت نا جوزہ تخوک آ تے تنیا الیپنہ۔ داخیا ل آتا درشانی ءِ او سلہہ بٹوک آ فراری تا بحالی نا چرجوئی ٹی ایف سی ہیڈ کوارٹر سبی ٹی اڈ ہلوک آ دود آن تران نا وخت آ کرے۔
داوخت آ سلہہ بٹوک آ فراری تا بحالی نا چرجوئی ٹی کالعدم تنظیم نا کمانڈر عبدالمجید بلوچ تون اوار 37 سلہہ بٹوک آتیٹی نقد زر ایف سی ہیڈ کوارٹر سبی ٹی بشخ و پانٹ کننگا، دود اٹی ایف سی مچھ انا کمانڈر کرنل کاشان، میجر اعظم ، میجر آصف، جے ایس او شہباز خان تون اوار ایف سی نا افسر و کانود نافذ کروک آ ادارہ غاتا کارندہ غاک شرکت کریر۔ دود اٹی کمشنر سبی ڈویژن غلام علی بلوچ ، کمانڈنٹ ایف سی کرنل احمد رضا خٹک، ڈپٹی کمشنر سیف اللہ کھیتران ، سینئر سپرنٹنڈنٹ آف پولیس سردار حسن موسیٰ خیل ، ڈسٹرکٹ چیئرمین ملک قائم الدین دہپال، میونسپل چیئرمین حاجی محمد داؤد رند سلہہ بٹوک آتیٹی نقد زر بشخ و پانٹ کرے ، دود آن تران کرسا کمشنر سبی ڈویژن غلام علی بلوچ پارے کہ سبی ڈویژن تون اوار مچ آبلوچستان اٹی امن نا اڈتننگ نا بابت ایف سی و سیکورٹی فورسزآتا کارکڑد ستاکڑزک ہراک علاقہ ٹی الس نا جان و مال انا رکھ اکن بیش بہا قربانی تسنو ہرا گم مفسہ اوپارے کہ کسرآن گم مروک آ فراری تے قومی دنگ اٹی اوار کننگ و اوفتے اسہ پرامن پاکستانی شاری اس جوڑ کننگ اٹی ایف سی ہراکڑد ءِ اداکرینے اونا اخس کہ صفت ءِ کننگے کم ءِ اوپارے کہ منہ عنصر غیر تا آلہ کار جوڑ مرسا تینا ہی بے گناہ معصوم ایلم تا لس خون ءِ کننگ ءُ ہرافتا بیخ کنی کن حکومت نا کنڈآن گام گیج کننگ انگ ءِ، اوپارے کہ سلہہ بٹوک آتے حکومت تنیا الیپک و اوفتا بحالی نا چرجوئی ٹی اوفتا مالی کمک تون اوار اوفتا چناتے تعلیم جان جوڑی کون آ بنداوی آسراتی اولیتی بنداو تیا تننگک اوپارے کہ شدت پسند آتے مرے کہ او قومی دنگ اٹی اوار مرسا ملک و گل زمین نا حقی وڑاٹ خذمت ءِ کیر اوپارے کہ انشاء اللہ او دے مر اف ہراتم بلوچستان پرامن و شونہال جوڑ مرسا مچ آملک اٹی مون آ بریک و داجاگہ نا الس شون و شونہالی نا حکومتی گام گیج آتیان براہ راست استفادہ دوئی کیرہ۔
