مجلس وحدت المسلمین ءِ ہڑتال ختم کننگ نا چرجوئی ٹی ہچ ءُ یخین دہانی اس کرفنگ تو، ترجمان وزارت داخلہ نا وضاحت

اسلام آباد(پاکستان نیوز پوائنٹ 29اگست 2016ء) ترجمان وزارت داخلہ مجلس وحدت المسلمین نا سروک علامہ راجا ناصر عباس جعفری نا بیان آ ردعمل نا درشانی ءِ کرسا صفا کرینے کہ وزیر داخلہ نا کنڈآن مجلس وحدت المسلمین تون نہ تو وعدہ اس کننگا و نہ ہی ہڑتال ختم کننگ نا چرجوئی ٹی یخین دہانی اس کرفنگاسس۔ دوشنبے آ برجاء بیان اٹی ترجمان پارے کہ وزیر داخلہ ہراتم 5 اگست آ علامہ ناصر عباس جعفری نا بیمار پڑسی کن ہسپتال آ ہناسس تو جان پڑسی نا وخت آ داحد اسکان ہیت ضرور مس کہ اگہ مجلس وحدت المسلمین شرط اس تخپ تو وزیر داخلہ صوبائی حکومت آتیان اوفتا معاملہ غاتے طے کرفنگ اٹی کمک کیک۔

ترجمان پارے کہ وزیر داخلہ چوہدری نثارعلی خان نا پبی کوشست مسنے کہ صوبائی حکومت آتا صلابت آن ایم ڈبلیو ایم نا خواست آتا مناسب ایسری اس پٹنگے تانکہ ایم ڈبلیو ایم نا سروک برانز ءِ ہلسا اہم قومی معاملہ غاتیا حکومت نا کسرشونی ءِ کننگ کیر ولے اوفتا کڑد ءِ غلط معنی بیرفنگ سراسز بیدادی اسے۔