اسلام آباد(پاکستان نیوز پوائنٹ 29اگست 2016ء) صدر مملکت ممنون حسین پارینے کہ تنازعہ کشمیر ءِ اقوام متحدہ نا سلامتی کونسل آتا قراردادآتا رداٹ ایسر مروئی مرے۔ پاکستان کشمیری تا تینا حق خودارادیت نا دوئی کن برجاء جہد نا سفارتی و اخلاقی کہول آ مخ تفی ءِ برجاتخک۔ پاکستان بے گناہ کشمیری تا برخلاف بھارتی سیکورٹی فورسز آتا پرتشدد کارروائی تا پبی مذمت ءِ کیک۔
اوداہیت ءِ آزاد کشمیر نا پوسکن گچین مروک آ صدر محمدمسعود خان تون دوشنبے آ ایوان صدرا ٹی اوڑدہی نا وخت آ پارے۔ صدر مملکت محمد مسعود خان ءِ آزاد جموں و کشمیر نا بطور صدر زمہ واری سنبھالنگ آ مبارکبادی تس۔ صدر مملکت آزاد کشمیر اٹی ساڑی آ گچین کاری تا سرسہب اڈتننگ و گچین حکومت ءِ پرامن اقتدار نا منتقلی آ است جمی نا درشانی ءِ کرے۔ صدر مملکت دا اومیت نا درشانی ءِ کرے کہ پوسکن گچین مروک آ صدر آزاد کشمیر کشمیر نا ویل ءِ جہانی کہول آ تالان کننگ اٹی تینا بھلا آزموندہ و غٹ تر لائخی تے کاریم اٹ اتیک۔
صدر مملکت پارے کہ صدر آزاد جموں و کشمیر تینا پوسکنا زمہ واری تے جوان وڑاٹ نبھائفک۔ صدر آزاد جموں و کشمیر محمد مسعود خان صدر مملکت تون آزاد کشمیر نا جمی حالیت آتیا خیال آتا درشانی ءِ کرے و صدر مملکت نا آزاد جموں و کشمیر نا معاملہ غاتیٹی است خواہی ہلنگ آ اونا منت واری ءِ ادا کرے۔
