پاک چین اقتصادی راہداری نہ صرف پاکستان بلکن مچ آ ڈیہہ کن ”گیم چینجر“ ثابت مریک،

راہداری آن علاقہ ٹی امن ، شون و شونہالی نا پوسکنا دور انا بناء مریک وزیراعظم محمد نواز شریف نا پاک چین اقتصادی راہداری سمٹ و ایکسپو نا افتتاحی نشست آن تران

پاک چین اقتصادی راہداری نہ صرف پاکستان بلکن مچ آ ڈیہہ کن ”گیم چینجر“ ثابت مریک،
راہداری آن علاقہ ٹی امن ، شون و شونہالی نا پوسکنا دور انا بناء مریک وزیراعظم محمد نواز شریف نا پاک چین اقتصادی راہداری سمٹ و ایکسپو نا افتتاحی نشست آن تران

اسلام آباد (پاکستان نیوز پوائنٹ 29اگست 2016ء) وزیراعظم محمد نواز شریف پارینے کہ پاک چین اقتصادی راہداری نہ صرف پاکستان بلکن مچ آ ڈیہہ کن ”گیم چینجر“ ثابت مریک، راہداری آن علاقہ ٹی امن ، شون و شونہالی نا پوسکنا دور انا بناء مریک۔ اوداہیت ءِ دوشنبے آ داڑے پاک چین اقتصادی راہداری سمٹ و ایکسپو نا افتتاحی نشست آن تران کرسا پارے ہرانا بست و بند ءِ وزارت ڈٹ بندی شون و اصلاحات 46ارب ڈالر خڑچ انا تاریخی سی پیک ڈٹ انا بابت پاک چین فرینڈ شپ سینٹر اٹی کرے۔

وزیراعظم دا شان و شون ڈٹ ءِ سفارتکاری ٹی اسہ پوسکن ءُ تصور اس گوندسا پارے کہ دانا کمک اٹ بے روزگاری و نیزگاری نا چٹفنگ اٹی کمک رسینگک۔ وزیراعظم پارے کہ سی پیک محض اسہ سٹریٹجک معاہدہ اس اف بلکن پاکستان و چین نا نیام اٹ عشرہ متکنا سنگتی نا بڑزکو و تاریخی مثال اس ہم ارے۔ اوپارے کہ دا جہانی اہمیت نا اہم معاملہ غاتیا ہڑتوم آ ملک آتا نیام اٹ کمکاری و اشتراک کار نا تاریخ اٹی تعلقداری تا اسہ بروک آ مرحلہ ءِ۔

وزیراعظم پارے کہ ہڑتوم آ ملک آک اسہ ایلو ءِ مشکل اٹی وخت اس ہم تنیا ہلیتوس ، 2005ء ٹی زمی جمب و 2010 ء ٹی سیلاب آن گڈ چین پاکستان نا پبی کمک ءِ کرے۔ وزیراعظم پارے کہ چینی صدر شی جن پنگ پاکستان نا ساڑی آ دورہ نا وخت آ پارلیمان ءِ پارے کہ پاکستان ہمووخت آ چین اتون سلیس ہراتم او تنیا ئس و داسا چین اقتصادی مشکل اٹی پاکستان ءِ تنیا ہلیتو۔ اوہڑتوم آ ملک آتا نیام اٹ تعلقداری تے خصوصی گوندسا پارے کہ ہڑتوم آ ملک آک بین الاقوامی فورم آتیا ہمیش اسہ ایلو نا مخ تفی ءِ کریر و اوفتا تعلقداریک پک و خلوص آ مبنی ءُ۔

وزیراعظم پارے کہ ڈیہہ ٹی امن و استحکام کن ہڑتوم آملک آک اواری اٹ کاریم کننگ ءُ و کرسا کیرہ۔ وزیراعظم سی پیک ءِ 21می صدی نا اہم ترین گام گوندسا پارے کہ دا پاکستان نا ویژن 2025ء آن پبی ہم آہنگ و کمکار ءِ۔ اوپارے کہ پاکستان مون آ بروک آ معیشت ءِ و قدرتی وسیلہ غاتیان مالامال ءِ۔ وزیراعظم مسکوہی 8 سال اٹی بڑزکو انگا جی ڈی پی نا حوالہ ءِ ترسا پارے کہ ملک انا اسٹاک مارکیٹ بے کچ فعال ءِ۔

درملکی زرمبادلہ نا کوڑی دوگنا مسنے، ملک اٹی سیکورٹی نا حالیت آک نمان وڑاٹ گچین مسنو۔ وزیراعظم پارے کہ اگرچہ دا ڈٹ انا خڑچ 46 ارب ڈالر ءِ ولے دانا مثبت زئم داڑآن کیہی گنا زیات ءِ و دا پائیدار مریک ۔ وزیراعظم پارے کہ 35 ارب ڈالر صرف و صرف توانائی نا بشخ آتے کن ءُ ہراڑآن 10400 میگاواٹ بجلی ودی مریک و داڑآن پاکستان نا معیشت ءِ سوگوی ملک۔ داڈٹ آن پاکستان نا غٹ علاقہ غاتے فائدہ مریک و خیبرپختونخوا و بلوچستان نا مر مر انگا علاقہ و گلگت بلتستان ءِ اسہ وڑفائدہ رسینگک۔

اوگوادر نا شون ءِ سی پیک ڈٹ اٹی بنداوی اہمیت نا حامل گوندسا پارے کہ دا تینا بجلی نا پیداوار ، مواصلاتی رابطہ غاتا حامل مریک و اسہ ماڈل سمارٹ پورٹ سٹی اس شمار مریک۔ وزیراعظم پارے کہ ملک اٹی توانائی نا گیشتر ڈٹ 2018 ء اسکان پورو مریرہ ہراڑآن ملک ءِ لوڈشیڈنگ آن نجات ملک۔ دود اٹی بنجائی وزیر ڈٹ بندی و شون احسن اقبال ، وزیراعظم نا سلاہکار خارجہ امور سرتاج عزیز ، چیئرمین پارلیمانی کمیٹی سی پیک مشاہداللہ خان ، پاکستان اٹی چینی سفیر سن وائی ڈونگ و پنی صنعت کار، سفیر وکاروباری شخصیت آک شرکت کریر۔ داکان مست وزیراعظم سی پیک ایکسپو نا افتتاح ءِ ہم کرے۔