اسلام آباد(پاکستان نیوز پوائنٹ 26اگست 2016ء) پاک بحریہ نا سروک ایڈمرل محمد ذکاء اللہ پارینے کہ معاہدہ نا رداٹ چین پاکستان ءِ 8 سب میرینز فراوان کیک، چین اٹی تیار مروک آ 4سب میرینز2022-23ء ٹی پاکستان نا حوالہ کننگک وخت اس کہ پاکستان اٹی تیار مروک آ 4سب میرینز2028 ء ٹی پاک بحریہ نا حوالہ کننگک۔ او جمعہ آ قومی اسمبلی نا قائمہ کمیٹی دفاع ءِ بریفنگ تسکہ۔
قائمہ کمیٹی نا دیوان چیئرمین روحیل اصغر نا کماشی ٹی نیول ہیڈ کوارٹر اٹی اڈ ہلک ہراٹی پاک بحریہ نا سروک آتون اوار بحریہ نا ایلو کمامدار و کمیٹی نا باسک آک ہم شرکت کریر۔ پاک بحریہ نا سروک قومی اسمبلی نا قائمہ کمیٹی برائے دفاع نا نیول ہیڈ کوارٹر دورہ غا خیرمقدم ءِ کرے۔ کمیٹی ءِ چین نا کنڈآن پاکستا ن ءِ تروک آ سب میرینز معاہدہ نا بابت بریفنگ ترسا پاننگاکہ چین پاکستان ءِ 8 سب میرینز تننگ نامعاہدہ مسنے ہرانا رداٹ 4 سب میرینز چین اٹی تیار مریرہ ہرانا فتا پوروی 2022-23ء ٹی مریک وخت اس کہ ایلو 4سب میرینز کراچی شپ یارڈ اٹی 2028ء اسکان تیار مریک۔
قائمہ کمیٹی دفاع پاک بحریہ نا کنڈآن تروک آ بریفنگ آ است جمی نا درشانی ءِ کرے و اومیت ظاہر کرے کہ دا معاہدہ نا پوروی پاکستان نا ساحلی سیکورٹی پین موثر و فعال مننگ کیک۔ کمیٹی پارے کہ پاک چین اقتصادی راہداری ڈٹ انا تعمیرات آتا بناء آن پاک بحریہ نا زمہ واری تیٹی پین ودکی مسنے۔ کمیٹی سفارش کرینے کہ سی پیک ڈٹ انا بابت آن پاک بحریہ ءِ انت کہ درکار فنڈز اسے او فی الفور فراوان کننگر تانکہ سیکورٹی نا بابت آن مون تروک چیلنج آتون جوا ن وڑاٹ مون تننگ مرے۔
دیوان اٹی باسک کمیٹی طاہر بشیر چیمہ، اسفند یار بھنڈرا، میر دوستان، ثریا اصغر ، سردار محمد شفقت حیات خان، لیفٹیننٹ کرنل (ر) غلام رسول ساہی، سعید احمد خان منہیس، محمد جنید انور چوہدری، نواب علی وسان، سید مصطفی محمود ، ملک محمد عامر ڈوگر، سنجے پروانی و محمد اعجاز الحق شرکت کریر۔
