اسلام آباد۔(پاکستان نیوز پوائنٹ 26اگست 2016ء) وزیر داخلہ چوہدری نثارعلی خان جعلی شناختی کارڈ نا حامل در ملکی تے تینا شناختی دستاویز ات سرنڈر کننگ کن پین اسہ تو اسے نا مہلت تسنے تانکہ جعل سازی آن کارڈ دوئی کروک آ دا مد آن فائدہ ہرفسا نادرا تون رجوع کننگ کیر ، شناختی کارڈز آتا تصدیق نا مہم نا وخت آ داوخت اسکان مچ آ ملک اٹی 60درسد شناختی کارڈ ز آتا تصدیق کننگانے، جعلسازی اٹی اوار نادرا نا 80 کارندہ غاتا پیدواری کننگانے، رجسٹریشن کن 132آئی این جی اوز نا درخواست موصول مسر، 46 ءِ کاریم کننگ نا موکل تننگانے، ای پاسپورٹ نا اجراء منہ تواٹی کاریم نا بناءِ کننگک، بروک آ سال اسکان ہر ضلع ٹی پاسپورٹ دفتر اڈ تننگک۔
داخیال آتا درشانی ءِ وزیرداخلہ چوہدری نثارعلی خان تینا کماشی ٹی اڈ ہلوک آ بڑزکو کہول نا دیوان آن تران کرسا کرے ہراٹی آئی این جی اوز نا رجسٹریشن ، نادرا شناختی کارڈز انا تصدیق نا عمل و ای پاسپورٹ نا اجراء تون اوار ایلو معاملہ غاتا جاچ ءِ ہلنگا۔ وزیر داخلہ دیوان آن تران کرسا پارے کہ تماشبینی بھاز مسنے ، ڈرامائی گڑاک بھاز مریرہ ولے کاریم مفک۔
پاسپورٹ نا بابت ہزار آ ڈپلومیٹ و آفیشل پاسپورٹ منسوخ مس۔ ای سی ایل پالیسی ٹی اصلاحات اتنگا۔ بیشتر نا پاسپورٹ منسوخ مس ، یورپ آن ہلیس امریکہ اسکان ویزہ نا پابندی ہلوکہ۔ ہراتم اسکان نن تصدیق کپن پاکستانی ہم مرے ویزہ جاری مننگ کپک۔ نن ایئر لائنز آ 4کروڑ آن زیات جرمانہ کرینے، داسا ائر لائن 100 وار سوچک، 62 کالعدم تنظیم ءُ اوفتا سنٹر لائز ڈیٹا بینک قائم کرے۔
انٹرنیشل این جی اوز نا بابت آن وزیر داخلہ پارے کہ جنرل مشرف دور اٹی بلااجازت درجن این جی اوز کاریم کریرہ، پاسپورٹس نا نظام اٹی ہم بھاز انگا بدلی تے اتنگانے، 72 پوسکن ءُ پاسپورٹس دفترقائم کرینے، بروک آ سال فروری اسکان ملک انا ہر ضلع ٹی پاسپورٹ دفتر مریک۔ نیشنل بینک نا کیہی پین برانچ آتے فیس جمع کننگ نا اختیار ترسا بھتہ خوری نا خاتمہ ءِ کرے۔
مستین یکونیم آن پونے اِراسال آتیٹی ایف آئی اے 16ارب آن زیات ریکوری کرینے۔ سد آ ایجنٹ آتے جیل انا پد رسیفنگا۔ مشین ریڈ ایبل پاسپورٹ ننا دور اٹی بناء کرے اوڑآن جعلی پاسپورٹ نا سدباب مس۔ کنا پین خوائش ءِ کہ بروک آ منہ تو اٹی دا پاسپورٹ نا اجراء شروع مرے۔ دابابت آن نن دنیا نا جدید ترین ٹیکنالوجی ءِ کاریم اٹ اتنگ نا خواہندار اُن۔ اوپارے کہ نادرا شناختی کارڈز آتا دُوارہ تصدیق نا بابت آن اللہ تعالیٰ مہربانی فرمائفے و داخہ در سرسہبی ننا وہم و گمان اٹی ہم ہلوکہ۔
الس و میڈیا نا کمک حیران کن ءِ۔ پنجا درسد آن زیات شناختی کارڈز نا تصدیق مسنے۔ دیوان اٹی تعلقدار افسر بریفنگ ترسا پارے کہ 31دسمبر 2015ء اسکان 132درخواست آئی این جی اوز نا موصول مس، 115 نا رپورٹس موصول مس، 63 نا رپورٹ ءِ داسکان بروئی ءِ، 46 منظور شدہ آئی این جی اوز ءُ، 37 آ دستخط مسنے۔ چوہدری نثارعلی خان پارے کہ نائلہ ظفر و اونا ٹیم جوان ءُ کاریم اس کرینو، ننا ارادہ ءِ کہ بروک آ 6 تو انا تہہ ٹی غٹ آئی این جی اوز آتا فیصلہ مرے ہرا این جی اوز آک کاریم نا بناءِ کیرہ او باقاعدہ شفاف انداز اٹی قواعد نا رداٹ کاریم کیرہ۔
