اسلام آباد(پاکستان نیوزپوائنٹ12اکتوبر2017ء) وزارت ڈٹ بندی، شونداری و اصلاحات نا سیکرٹری شعیب احمد صدیقی پارینے کہ پاکستان اٹی ورناتا بے روزگاری نا ویل اتون مون تننگ کن پوسکن ءُ کاروباری ذریعہ و آئیڈیا غاتے مون آ دننگ نا گرج ءِ۔ داڑآن ملک اٹی نیزگاری ٹی کمتی و روزگار نا پوسکن ءُ وارخواہی ودی کننگ اٹی کمک رسینگک۔ داخیال آتا درشانی ءِ او پنچ شنبے نادے وزارت ڈٹ بندی، شوندار ی واصلاحات نا سینٹر فارسوشل انٹرپرینئر شپ نا کنڈآن ”سوشل انٹرپرینئر شپ انا ودوک آ کڑد“ انا سرحال آ سیمینار آن تران کرسا کرے۔
سیمینار ءِ پاکستان پلاننگ اینڈ مینجمنٹ انسٹیٹیوٹ اٹ کننگا۔ سیکرٹری وزارت شونداری، اصلاحات و ڈٹ بندی شعیب احمد صدیقی دود انا مہمان خاص ئس۔ سیمینار اٹی پوسکن آ کاروباری وڑوڈول و ذرائع تے کاریم اٹ اتسا الس نا مشکل آتیٹی کمتی اتنگ و داوڑ ملک آن نیزگاری ءِ کم کننگ و روزگار نا پوسکن ءُ وارخواہی ودی کننگ نا بابت ترانکار آک تینا خیال آتا درشانی ءِ کریر۔
پلاننگ کمیشن نا باسک سوشل سیکٹر اینڈ ڈیولوشن عصمہ حیدر، ڈپٹی چیف سوشل ویلفیئر سیکشن و سینٹر فارسوشل انٹر پرینئر شپ نا پروجیکٹ ڈائریکٹر نثار احمد و سینٹر نا بزنس ڈویلپمنٹ منیجر جواداے کے ترین ئسک ہم سیمینار آن تران کریر۔ سیکرٹری وزارت ڈٹ بندی، شونداری و اصلاحات شعیب صدیقی ملک اٹی راجی انٹرپرائزز نا مون آ دننگ کن راجی شرحالی نا بشخ اٹی کاریم کروک آ کڑدہ غاتا نیام اٹ رابطہ غاتا مون آ دننگ نا گرج آ زور شاغا۔
اوپارے کہ پلاننگ کمیشن اٹی داسینٹر نا اڈتننگ وزارت نا اسہ اہم ءُ سرسہبی اسے ہرانا کمک اٹ سوشل انٹرپرینئر شپ انا بشخ اٹی پالیسی و ڈٹ بندی نا کنڈآپیش گامی کننگ مریک۔ اوپارے کہ وزارت داسینٹر نا اڈتننگ کن قائدانہ کڑد ادا کرینے ہراڑآن ملک انا راجی بشخ یعنی تعلیم، جان جوڑی ، راجی شرحالی ، خصوصی تعلیم ، صنف و زالبول ءِ بااختیار جوڑ کننگ، خور انا رکھ، راجی رکھ و دیر وسینی ٹیشن کون آ بشخ آتیٹی قومی ڈٹ بندی ممکن مننگ کیک۔
