اسلام آباد(پاکستان نیوزپوائنٹ11اکتوبر2017ء) صدر مملکت ممنون حسین اسلامی کمکار تنظیم نا سائنس و ٹیکنالوجی نا تنظیم (کامسٹیک) ءِ پارت کرینے کہ او اسلامی سروک کانفرنس آستانہ نا فیصلہ غاتیا عملدرآمد نا رفتار ءِ ترند کے۔ صدر مملکت ممنون حسین ہرا اسلامی کمکار تنظیم نا سائنس و ٹیکنالوجی کمیٹی (کامسٹیک) نا چیئرمین ہم ارے، داہیت ءِ چارشنبے نادے اسہ بریفنگ اسے نا وخت آ پارے ہرا کامسٹیک نا کوآرڈینیٹر جنرل شوکت حمید تینا ٹیم اتون اوار اودے تس۔
داوخت آ ہائر ایجوکیشن کمیشن ، وزارت سائنس و ٹیکنالوجی و وزارت خارجہ تون اوار ایلو بڑزکو کمامدارآک ہم ساڑی ئسر۔ صدر ممنون حسین پارے کہ اسلامی دنیا ٹی سائنس و ٹیکنالوجی نا شونداری و لس بندغ نا زند انا معیار ءِ بڑز کننگ کن تعلیم وپٹ وپول نا مون آ دننگ المی ءِ۔ داچرجوئی ٹی اسلامی دنیا ٹی المی تعلیمی و پٹ وپولی ادارہ جوڑ کننگے و مست آن ساڑی ادارہ غاتا لائخی ٹی ودکی کننگے۔
صدر مملکت پارت کرے کہ سائنس و ٹیکنالوجی نا بارواٹی اسلامی سروک کانفرنس آستانہ ٹی منظور کروک آ سلاہ تیا عملدرآمد ءِ المی جوڑ کننگ کن درکار وسیلہ غاتا دوئی کننگ کن قابل عمل حکمت عملی تیار کننگے و عطیہ تروک آملک آتا تعلقدار ادارہ غاتیٹی نمائندگی ءِ المی جوڑ کننگے تانکہ تین پہ تینی صلابت و افہام و تفہیم اٹ معاملہ غان مون آ ہِننگ کیر۔ صدر مملکت پارے کہ پوسکن آ نسل مسلم دنیا نا اصل سرمایہ غاک ءُ، اوفتا گچین تعلیم و تربیت کن ہر حداسکان ہِننگے۔ داوخت آ ہائر ایجوکیشن کمیشن نا چیئرمین ڈاکٹر مختار احمد، وزارت سائنس و ٹیکنالوجی نا سیکرٹری یاسمین مسعود و وزارت خارجہ نا ایڈیشنل سیکرٹری امتیاز احمد آن بیدس ایلو بڑزکو کمامدارآک ہم ساڑی ئسر۔
