سیکورٹی فورسز آتا قربانی تا نتیجہ ٹی اڈہلوک آامن ءِ ہچ ءُ دروشم اسے ٹی خراب مننگ کن ہلنگ پننگک، وزیراعلیٰ بلوچستان نواب ثناء اللہ خان زہری

سیکورٹی فورسز آتا قربانی تا نتیجہ ٹی اڈہلوک آامن ءِ ہچ ءُ دروشم اسے ٹی خراب مننگ کن ہلنگ پننگک، وزیراعلیٰ بلوچستان نواب ثناء اللہ خان زہری

کوئٹہ(پاکستان نیوز پوائنٹ 26اگست 2016ء) وزیراعلیٰ بلوچستان نواب ثناء اللہ خان زہری پارینے کہ سیکورٹی فورسز آتا قربانی تا نتیجہ ٹی اڈ ہلوک آ امن ءِ ہچ ءُ دروشم اسے ٹی خراب مننگ کن ہلنگ پننگک امن و شون نا کسر اٹی بروک آ عنصر و اوفتا سرکڑدہ غاتے زوت اوفتا کروک نا سزا ترفنگک۔ وزیراعلیٰ بلوچستان ضلع گوادر نا تحصیل سنٹ سر نا علاقہ کلدان اٹی لیویز کارندہ غاتیا دہشت گردآتا جلہو نا ترند انگا لوز آتیٹی مذمت ءِ کرسا سم کاری آن لیویز کارندہ و تحصیلدار جیونی نعیم گچکی نا شہیدی آ دلی ڈکھ و غم نا درشانی ءِ کرینے کمشنر مکران آن واقعہ نا تفصیلی رپورٹ ءِ بٹنگسا وزیراعلیٰ پارت کرینے کہ واقعہ ٹی اوار دہشت گرد آتا دزگیری کن غٹ وسیلہ غاتے کاریم اٹ ہتنگے و اوفتا ٹھکانہ غاتسکان اوفتا پدرند ءِ خلنگے وزیراعلیٰ پارے کہ دہشت گرد آک لغوری کارروائی کرسا ڈکسا جلہو کننگ ءُ ہنداخاطران سیکورٹی ادارہ غاتے ہمہ وخت مستعد و چست سلوئی مریک تانکہ دہشت گرد آتے کارروائی کننگ نا موقع رسینگپ و جلہو نا دروشم اٹی اوفتے پبی ورندی تننگ مرے۔

وزیراعلیٰ پارت کرے کہ علاقہ ٹی غٹ سیکورٹی ادارہ غاک اسیجائی وڑاٹ سرچ آپریشن کرسا دہشت گرد آتے اوفتا انجام اسکان سرکیر۔ دہشت گردی نا داوڑ نا کارروائیک اسہ وڑاسے ٹی ہم قابل برداشت افس اوپارے کہ دہشت گرد آک اسہ سوچ سمجھ ڈٹ اسے نا رداٹ تینا آقاء تا اشارہ غا بلوچستان اٹی بدامنی ودی کننگ خوارہ حکومت تہہ نا و پیشن نا سازش آتے بے سہب جوڑ کننگ کن پرعزم ءِ و دہشت گرد آک ننا ادارہ غاتے نزور کننگ کپسہ ننا دلیر سیکورٹی فورسز آک آخریکو دہشت گرد انا چٹفنگ اسکان اوفتا پند رند ءِ برجاتخرہ۔

وزیراعلیٰ واقعہ ٹی شہید مروک آ لیویز کارندہ غاتا خاہوت آتون دلی ہمدردی و ہڑزخواہی نا درشانی ءِ کرسا دعا کرینے کہ اللہ تعالیٰ شہید آتا درجہ غاتے بڑز کے و پد سلوک آتے صبر کننگ نا توفیق عطاء فرمائفے۔ اوٹھپی تا زوت جان جوڑی کن نیک است خواہی تا درشانی ءِ کرے۔ اوکان بیدس وزیراعلیٰ بلوچستان نواب ثناء اللہ خان زہری ایم ایس چمن ہسپتال ڈاکٹر اختر نا مار اسفند نا برمتہ نا واقعہ نا سختی اٹ نوٹس ءِ ہلسا ڈپٹی کمشنر قلعہ عبداللہ و پولیس کمامدار آتے برمتہ مروک آنا دمدستی و باحفاظت بازیابی ءِ باوری جوڑ کننگ نا پارت کرینے۔

وزیراعلیٰ چمن اٹی برمتہ نا واردات آتیا برہمی نا درشانی ءِ کرسا پارے کہ حالیت آتا گچینی کن انتظامیہ و پولیس گچین گام گیج کے و دا واردات آتے ٹی اوار عنصر آتے زوت آن زوت اوفتا کروک نا سزا ترفنگ کن ہرحد اسکان ہِننگے۔ وزیراعلیٰ چمن شار اٹی سیکورٹی بست و بند آتیٹی ودکی کننگ نا پارت ہم کرینے۔