اسلام آباد (پاکستان نیوز پوائنٹ 25اگست 2016ء) صدر مملکت ممنون حسین قدرتی آفت و حادثہ غاتا وخت آ انجمن ہلال احمر پاکستان نا خذمت آتا ستاءِ کرسا پارے کہ اونا کارکڑد اٹی پین گچینی کن انجمن نا غٹ تنظیم آتے اسہ ضابطہ کار اسے ٹی ہتنگے و اوڑکن غٹ المی گرج آتے پورو کننگے۔ صدر مملکت داہیت ءِ پنچ شنبے آ داڑے انجمن ہلال احمر نا کنڈآن پیش کروک آ اسہ بریفنگ اسے نا وخت آ پارے۔
داوخت آ انجمن ہلال احمر پاکستان نا چیئرمین ڈاکٹر سعید الٰہی و ایلو کمامدارآک ساڑی ئسر۔ صدر مملکت پارت کرے کہ آفت، حادثہ و اوڑتون ملوک آ حالیت آتیٹی گچین کارکڑد کن تعلقدار بشخ آتیٹی تربیت یافتہ افرادی واک انا تیاری کن انجمن ہلال احمر جامع ڈٹ بندی اس کے تانکہ خذمت آتامعیار اٹی گچین بننگ کے و پاکستان دا چرجوئی ٹی ہمسایہ ملک آتا کمک کننگ نا ہم قابل مننگ کے۔
اوپارت کرے کہ انجمن ہلال احمر پاکستان دا چرجوئی ٹی بنائی وڑاٹ تعلیمی ادارہ و جامعہ غاتا کمک ءِ دوئی کے و آخبتی یونیورسٹی تا اڈتننگ کن ٹھوس لائحہ عمل اس تیار کے۔ صدر مملکت ممنون حسین پارے کہ پاکستان اٹی کاریم کروک آ انجمن ہلال احمر نا صوبائی و علاقائی شاخ تا کارکڑد اٹی گچینی ہتنگ کن اسیجائی ضابطہ کار اسے نا گرج ءِ ہراڑآ ترند رفتاری اٹ بایدے کاریم مرے۔
اوپارے کہ صوبائی و علاقائی تنظیم تے اسہ دنگ اسے ٹی ہتسا انجمن نا کارکڑد اٹی پین ترندی ہتنگ مریک۔ اوپارت کرے کہ زند انا کیہی بشخ آتیٹی خذمت انجام تروک آ ایلو ادارہ و انجمن ہلال احمر نا نیام اٹ موثر رابطہ بایدے قائم مرے تانکہ امدادی سرجزآک زیات گچین مننگ کیر۔ انجمن ہلال احمر نا چیئرمین ڈاکٹر سعید الٰہی داوخت آ انجمن نا سرجزو خذمت آتا بارواٹی صدر مملکت ءِ بریفنگ تس۔ صدر مملکت انجمن نا خذمت آتا ستاءِ کرسا پارے کہ او تینا سرجزآتا دنگ اٹی پین ودیکی اتے و پسماندہ علاقہ غاتا الس نا زند اٹی آسانی ہتنگ کن قومی پٹ وپولی ادارہ غاتون اواری اٹ گچین گام گیج کے۔
