صدر مملکت ممنون حسین نا پیشن نا ملک اٹی تعینات مروک آ پاکستان انفارمیشن رڑانا پریس افسر آتون ہیت وگپ

صدر مملکت ممنون حسین نا پیشن نا ملک اٹی تعینات مروک آ پاکستان انفارمیشن رڑانا پریس افسر آتون ہیت وگپ

اسلام آباد(پاکستان نیوز پوائنٹ 24اگست 2016ء) صدر مملکت ممنون حسین پارینے کہ پاکستان اسہ اعتدال پسند ، امن پسند و شون پسند اسلامی ریاست اسے، دنیا ٹی پاکستان نا حقی عکس ءِ پیش کننگ نا گرج ءِ تانکہ پاکستان نا بارواٹی خلقت آتا نیام اٹ خننگوک آ غلط فہمی تے مر کننگ مرے۔ صدر مملکت داہیت ءِ چارشنبے آ پیشن نا ملک اٹی تعینات مروک آ پاکستان انفارمیشن رڑانا پریس افسر آتون ہیت وگپ کرسا پارے۔

صدر مملکت پارے کہ پریس افسر آک پاکستان نا بارواٹی موثر امیج و بیداری ودی کننگ و ملک ءِ اسہ حقی جمہوری و شون پسند ملک اس جوڑ کننگ کن تینا کڑد ءِ ادا کیر۔ اوپارے کہ پریس افسر آک اقتصادی و راجی بشخ آتیٹی شون اکن پاکستان نا اصل سرسہبی تے تالان کیر تانکہ زرکارآک پاکستان نا کنڈآ متوجوہ مریر۔ صدر مملکت پارے کہ ساڑی آ دور اٹی احوالکار آتا سفارتکاری ٹی بھلو اہم کڑد اسے و احوالکار آک اونا اہمیت ءِ پین ودفینو۔

صدر مملکت پارے کہ دنیا داسا گلوبل ویلج اس جوڑ مسنے و سوشل میڈیا لس بندغ ءِ صحافی جوڑ کرینے، داسوب داسا پریس افسر آتیا بھلو زمہ واری اس مریک کہ او حکومت نا پالیسی تے مون آ دیر و قومی مفادات نا رکھ ءِ باوری جوڑ کیر۔ صدر مملکت پارے کہ نما اولین اولیت بایدے دامرے کہ پاکستان جمہوری ، اعتدال پسند و پرامن ریاست اسے و او تینا غٹ ہمسایہ ملک آتون دوستانہ تعلقداری تا خواہندار ءِ۔

صدر مملکت پارے کہ پاکستان نا الس امن پسند ءِ و پاکستان نا مخیر خواجہ غاک تینا کٹیا نا گرانقدر بشخ اس شرحالی کاریم تیا خڑچ کیرہ۔ صدر مملکت پارے کہ پاکستان دہشت گردی نا برخلاف جنگ اٹی 60 ہزار آن زیات جان تا قربانی تسنے۔ اوآپریشن ضرب عضب آ است جمی نا درشانی ءِ کرسا پارے کہ آپریشن سرسہبی اٹ جاری ءِ و دا اومیت نا درشانی ءِ کرے کہ زوت اسے اٹ ملک آن دہشت گردی نا لعنت نا مون آ تورینہ۔

صدر مملکت پارے کہ تنازعہ کشمیر اسہ بین الاقوامی ءُ ویل اسے و اودے اقوام متحدہ نا قرارداد آتے مون آ تخسا ایسر کروئی مرے۔ پاکستان کشمیری تا تحریک خودارادیت نا سفارتی و اخلاقی کہول آ مخ تفی ءِ برجا تخک و دا اومیت نا درشا نی ءِ کرے کہ بین الاقوامی برادری اوٹی تینا کڑد ءِ ادا کیک۔ صدر مملکت پریس افسر آتے پارت کرے کہ او کشمیر اٹی بھارت نا کنڈآن کروک آ ظلم و جبر انا اصلی عکس ءِ پیش کیر و داہیت آ زور شاغر کہ تنازعہ کشمیر ءِ اقوام متحدہ نا قرارداد آتا رداٹ ایسر کننگے۔

صدر مملکت پارے کہ سی پیک ڈٹ آن مچ آ ڈیہہ ٹی بدلی بریک۔ اوپارے کہ توانائی ڈٹ آتا پوروی آن ملک اٹی 2018 ء اسکان لوڈ شیڈنگ نا خاتمہ مریک۔ صدر مملکت دا اومیت نا درشانی ءِ کرے کہ پریس افسر آک پورو لگن و خواری اٹ کاریم کیرہ و پاکستان نا شون اکن تینا غٹ تر لائخی تے کاریم اٹ اتیرہ۔