وزیراعظم شاہد خاقان عباسی تون بل اینڈ ملینڈاگیٹس فاؤنڈیشن نا شریک چیئرمین بل گیٹس نا اوڑدہی

وزیراعظم شاہد خاقان عباسی تون بل اینڈ ملینڈاگیٹس فاؤنڈیشن نا شریک چیئرمین بل گیٹس نا اوڑدہی

نیویارک(پاکستان نیوزپوائنٹ22ستمبر2017ء) وزیراعظم شاہد خاقان عباسی تون بل اینڈ ملینڈاگیٹس فاؤنڈیشن نا شریک چیئرمین بل گیٹس پنچ شنبے نادے داڑے اوڑدہی کرے۔ بل اینڈ ملینڈا گیٹس فاؤنڈیشن نا شریک چیئرمین بل گیٹس پاکستان اٹی پولیو نا چٹفنگ کن اواری اٹ کاریم کننگ نا تینا عزم انا اعادہ ءِ کرے۔ اوپاکستان اٹی چندی ناجوڑی تا برخلاف رکھی ٹیکہ غاتا پروگرام نا دنگ ءِ ودفنگ تون اوار چندی بشخ آتیٹی تینا سرجزآتے ودفنگ اٹی ہم است خواہی نا درشانی ءِ کرے۔

وزیراعظم شاہد خاقان عباسی بل اینڈ ملینڈا گیٹس فاؤنڈیشن نا کنڈآن پاکستان اٹی خاص کر پولیو نا چٹفنگ و ایلو بشخ آتیٹی است خواہی ہلنگ آ اونا منت واری ءِ ہرفے و فاؤنڈیشن نا کنڈآن کروک آکاریم نا ستاءِ کرے۔ بل گیٹس پاکستان اٹی پولیو نا چٹفنگ نا مسخت دوئی کننگ کن حکومت پاکستان نا عزم آ وزیراعظم شاہد خاقان عباسی نا منت واری ءِ ہرفے۔ اووزیراعظم شاہد خاقان عباسی نا کنڈآن داچرجوئی ٹی جندی است خواہی نا ستاءِ کرے۔

بل گیٹس پاکستان نا الس کن مالیاتی خذمت آتے رسینگ نا قابل جوڑ کننگ کن است خواہی نا ہم درشانی ءِ کرے تانکہ او آن لائن خذمت و پیسہ غاتا گدریفنگ نا قابل مننگ کیر۔ بل گیٹس گدرینگوک آ چار سال اٹی پولیو نا چٹفنگ نا چرجوئی ٹی دوئی کروک آ سرسہبی تا ستاءِ کرے و داگمان نا درشانی ءِ کرے کہ غٹ کڑدہ غاک پاکستان اٹی سلوک آ مسہ پاکٹ آتیان پولیو نا پورو چٹفنگ نا مسخت دوئی کننگ کن تینا غٹ کوشست آتے کاریم اٹ اتیرہ۔ بل گیٹس پاکستان آن پولیو نا انسداد کن جوڑ کروک آ ٹیم انا باسک آتا تسلسل نا ہم ستاءِ کرے ہراک ٹیم ورک و کمٹمنٹ نا قابل تعریف معیار دوئی کرے۔ بل گیٹس داگمان نا درشانی ءِ کرے کہ وزیراعظم پولیو نا انسداد کن تینا کوشست آتے برجاتخک و داچرجوئی ٹی اونا جند است خواہی ہلیک۔