نیویارک(پاکستان نیوزپوائنٹ22ستمبر2017ء) وزیراعظم شاہد خاقان عباسی اقوام متحدہ نا سیکرٹری جنرل انتونیو گیٹریز تون پنچ شنبے نادے داڑے مروک آ اوڑدہی ٹی اونا مون آ کشمیر نا ویل ءِ چست کرے و بھارت نا کوزہ ٹی جموں و کشمیر اٹی انسانی حق انا خلاف ورزی تیا مبنی دستاویزی شاہدی تے حوالہ کرے۔ وزیراعظم اقوام متحدہ نا سیکرٹری جنرل آ زور شاغاکہ او کشمیر آ خصوصی نمائندہ اس پن کے۔
اوپارے کہ داالمی ءِ انتئے کہ بھارت ہروڑنا مذاکرات نا درگہ غاتے بند کرینے۔ وزیراعظم اقوام متحدہ نا سیکرٹری جنرل ءِ لین آف کنٹرول آ بھارتی سیکورٹی فورس آتا کنڈآن فائر بندی نا خلاف ورزی تا بارواٹی ہم معلومدار کرے۔ اوپارے کہ بیرہ ہندا سال اٹی 600 نا خڑک خلاف ورزی کننگا۔ وزیراعظم سیکرٹری خارجہ ءِ پارے کہ بیرہ اینو نا دے بھارتی فورس آتا سم کاری آن ایل او سی آ چار شاری شہید مسر۔
وزیراعظم شاہد خاقان عباسی و اقوام متحدہ نا سیکرٹری جنرل اوغانستان نا حالیت آتیا ہم خیال آتا درشانی ءِ کرے و اوغانستان اٹی پائیدار امن کن ہیت وگپ انا کمک اٹ نتیجہ سے آ سرمننگ نا گرج آ زور شاغا۔ وزیراعظم شاہد خاقان عباسی اقوام متحدہ نا پاکستان و بھارت کن ملٹری آبزرور رڑانا ودیکی آہم زور شاغا۔ اقوام متحدہ نا سیکرٹری جنرل پارے کہ پاکستان اودے بھاز دوست ءِ ، او کیہی وار پاکستان نا دورہ ءِ کرینے۔
اقوام متحدہ نا سیکرٹری جنرل پارے کہ او تینٹ پاکستان نا انسداد دہشت گردی آپریشن تا مشاہدہ ءِ کرینے و او داچرجوئی ٹی پاکستان نا کوشست آتا بھاز معترف ءِ ۔ اوپارے کہ او پاکستان اٹی جمہوریت نا سوگوی نا ہم بھاز ستاءِ کیک۔ سیکرٹری جنرل مسکوہی وزیراعظم محمد نواز شریف تون تینا اوڑدہی تے ہم خوشگوار وڑاٹ یات کرے۔ اوپاکستان نا امن ءِ برقرار تخوک آ کوشست آتیا اقوام متحدہ نا کنڈآن خراج تحسین ہم پیش کرے۔
