اسلام آباد(پاکستان نیوز پوائنٹ 24اگست 2016ء) پاکستان و چین نا نیام اٹ ہڑتوم آ کنڈآتا واپار نا کچ اٹی پدریسہ ودکی مننگ ءِ، تین پہ تینی واپار نا مون آ دننگ و اقتصادی رابطہ غاتیٹی پین ودکی کن ہڑتوم آ ملک آک ساڑی ہی ٹی آزادانہ واپار نا معاہدہ غا دستخط ہم کرینو، اقتصادی راہداری نا بابت چین پاکستان اٹی 46ارب ڈالر آن زیات نا زرکاری کننگ ءِ۔ چارشنبے آ پلاننگ کمیشن نا کمامدارآک اے پی پیءِ پاریر کہ پاکستان و چین نا نیام اٹ ہڑتوم آ کنڈآتا واپار نا سالانہ کچ اٹی پدریسہ ودکی مننگ ءِ و چین پاکستان نا ارٹ میکو بھلا شریدار ملک جوڑ مسنے۔
پاکستان ڈیہہ ٹی پوزیشن ، قدرتی وسیلہ غاتا فراوانی و باسن دیر تا بندرگاہ تا سوب چین اکن بے کچ اہمیت نا حامل ءِ۔ اوپاریر کہ ہڑتوم آ ملک آتا تین پہ تینی اقتصادی تعلقداری تیٹی پین ودکی مسنے، پاکستان نا جغرافیائی حیثیت، چین سویلی ایشیاء ءِ دے ٹکی نیامی تون منسلک کننگ نا رداٹ اقتصادی راہداری نا بابت پاکستان اٹی 46ارب ڈالر آن زیات نا زرکاری کننگ ءِ، سی پیک نا رداٹ چین پاکستان اٹی بندرگاہ ، جہازرانی ، بنداوی ڈھانچہ ، مواصلات و توانائی تون اوار ایلو کیہی بشخ آتیٹی زرکاری کننگ ءِ ، ہراڑآن پاک چین ہڑتوم آ کنڈآتا کمک و پاکستان نا معاشی شون انا مون آ دننگ اٹی کمک دوئی مریک۔
اوپاریر کہ پاک چین اقتصادی راہداری ڈٹ(سی پیک) ہڑتوم آ کنڈآتا تعلقداری تا روشن مثال ءِ ہرامچ آ دنیا نا چاہندار اقتصادیات نا نظر اٹی گیم چینجر اس ثابت مریک۔ چاہندار آتا رداٹ پاکستان ءِ سی پیک آن پبی فائدہ ہرفوئی مرے ہراڑآن نہ صرف ملک انا صنعتی شون اٹی ودکی مریک بلکن راجی و اقتصادی بشخ آتا ودکی ہم ممکن مننگ کیک، دا ڈٹ آن صرف چین آخا بلکن پاکستان نا تغ تا تعبیر ہم مریک ہراڑآن ڈیہہ نا مسہ ارب خلقت آتے فائدہ مریک۔
