کوئٹہ(پاکستان نیوز پوائنٹ 24اگست 2016ء) بنجائی وزیر سیمی و ریاستی امور لیفٹیننٹ جنرل (ر) عبدالقادر بلوچ پارینے کہ پاک چین اقتصادی راہداری ڈٹ انا گیٹ وے گوادر اٹی اسہ ارب روپئی نا بھلو زر اسے آن گوادر نا ورناتے پوسکنا گرج آتیان ہم آہنگ فنی و کسبی تعلیم نا زیور آن آراستہ کننگ کن پاک چین ٹیکنیکل ووکیشنل انسٹی ٹیوٹ نا اڈ تننگ ءِ عمل اٹی ہتنگ انگ ءِ وخت اس کہ الس ءِ جان جوڑی نا گچین آسراتی تا فراوانی کن گوادرا ٹی شش ارب روپئی نا خڑچ آن 50 کٹ آتا ہسپتال ءِ 300 کٹ آتسکان اپ گریڈ کننگ نا ڈٹ آ عملدرآمد جاری ءِ۔
داہیت ءِ ایسوسی ایٹڈ پریس آف پاکستان تون اسہ خصوصی انٹرویو اسے ٹی پارے، بنجائی وزیر سیمی و ریاستی امور لیفٹیننٹ جنرل (ر) عبدالقادر بلوچ پارے کہ 46ارب ڈالر ز نا پاک چین اقتصادی راہداری ڈٹ پاکستان نا روشنا آخبت ءِ ہراڑآن پورووڑاٹ استفادہ دوئی کننگ کن حکومت جامع ڈٹ بندی اس کرینے تانکہ اقتصادی راہداری ڈٹ انا غٹ وارخواہی تیان پورووڑفائدہ ہرفسا معیشت نا سوگوی تون اوار اوار الس نا زند انا معیار ءِ بڑزمرے و شون نا عمل اٹی الس ءِ شریدار جوڑ کننگ مرے۔
اوپارے کہ گوادر شاراٹی شونداری کاریم و بنداوی انفراسٹرکچر نا جوڑ جاڑ گوادرا ٹی ایکسپورٹ پراسسنگ زون اتھارٹی و گوادر انڈسٹریل اسٹیٹ ڈویلپمنٹ اتھارٹی نا اڈتننگ نا بابت 3.45ارب روپئی نا تخمینہ خلنگانے و گوادر اٹی دیر انا کمتی نا حالیت آتا مون ءِ توننگ کن واٹر ٹریٹمنٹ پلانٹ نا خلنگ آن بیدس دیر انا ایلو ڈٹ آتے کن 12 ارب روپئی جتا کننگانے وخت اس کہ بنجائی حکومت نا کمک آن گوادر اٹی زرکاری نا مون آ دننگ کن ٹیکسز و ڈیوٹیز آتیا چھوٹ تننگ کون آ گام گیج آتیان درملکی زرکارآک بلوچستان خاص کر گوادر اٹی برسا پبی وڑاٹ زرکاری کیرہ۔
بنجائی وزیر عبدالقادر بلوچ پارے کہ السی جمہوریہ چین پاکستان نا باپت ہمسایہ ملک ءِ ہڑتوم آ ملک آتا نیام اٹ تین پہ تینی اسٹریٹجک معاشی دودوربیدہ ہی و راجی تعلقداریک دہائی تیا محیط ءُ و پاک چین سنگتی ہر آزمائش و امتحان آ پورو سلیسونے و ہر بروک آ دے اٹی ہڑتوم آ برادر ملک آتیٹی ودکی ہم مرسا کننگ ءِ۔
