کوئٹہ(پاکستان نیوز پوائنٹ 23اگست 2016ء) حکومت بلوچستان نا ترجمان انوارالحق کاکڑ الطاف حسین نا برخلاف آئین ناآرٹیکل 6انارداٹ کارروائی کننگ نا خواست کرسا پارینے کہ الطاف حسین ہرازبان ءِ استعمال کرینے او دراصل مقبوضہ کشمیر آن توجوہ ءِ اسہ پلو کننگ نا کوشست اسے۔ داخیال آتا درشانی ءِ او سے شنبے آ پریس کانفرنس آن تران کرسا کرے۔ حکومت بلوچستان نا ترجمان انوارالحق کاکڑ پارے کہ الطاف حسین ہراوڑحساس ادارہ غاتا بابت آن زبان استعمال کرینے او بے کچ قابل مذمت ءِ۔
وزیراعلیٰ بلوچستان نواب ثناء اللہ خان زہری و حکومت بلوچستان قومی سلامتی نا برخلاف داوڑنا گام گیج آتا مذمت ءِ کیرہ۔ اوپارے کہ بلوچستان نا الس الطاف حسین آن بے زاری نا درشانی ءِ کننگ ءِ اردو پاروک آک و ملک انا 20 کروڑ الس ہم الطاف حسین آن بے زاری نا درشانی ءِ کیر۔ اوپارے کہ دراصل اقوام متحدہ ہراوڑمقبوضہ کشمیر نا تحریک آجوئی نا مخ تفی ءِ کریر تو بھارتی وزیراعظم دنیا نا توجوہ ءِ مُر کننگ کن داوڑنا بیان آتے جاری کرفنگ ءِ ہرانا اخس کہ مذمت ءِ کننگے کم ءِ۔ اوپارے کہ حکومت بلوچستان الطاف حسین نا دارویہ نا نہ صرف مذمت ءِ کیک بلکن حکومت پاکستان آن خواست کیک کہ الطاف حسین نا برخلاف آئین نا آرٹیکل 6انا رداٹ کارروائی کننگے۔
