اسلام آباد(پاکستان نیوز پوائنٹ 23اگست 2016ء) وزیراعظم محمد نواز شریف پارینے کہ بنجاء نا بست و بند اٹی قبائلی علاقہ جاٹ (فاٹا) ٹی اصلاحات علاقہ نا الس نا شون اکن بے کچ اہم ءِ و دا نیشنل ایکشن پلان نا المی جزو ءِ ، فاٹا نا آخبت نا فیصلہ ءِ او علاقہ غاتا الس نا است خواہی تا وڑوڈول کننگک۔ او داہیت ءِ سے شنبے آ وزیراعظم ہاؤس اٹی فاٹا اصلاحات کمیٹی نا دیوان نا کماشی ءِ کرسا پارے۔
وزیراعظم پارے کہ فاٹا ٹی اصلاحات آتا مقصد ملک انا بھلو وخت اسے آن نظر انداز شدہ علاقہ غاتے بنجائی دنگ اٹی ہتنگ نا ءِ۔ اوپارے کہ فاٹا نا آخبت نا فیصلہ ءِ اوعلاقہ غاتا الس نا است خواہی تا وڑوڈول کننگک، فاٹا نا الس امن و جنگ انا زمانہ ٹی بے شمار قربانی پیش کرسا ننا قومی کاز کن نمان کڑد ادا کرینو۔ وزیراعظم نا سلاہکار خارجہ امور و کمیٹی نا سروک سرتاج عزیز پارے کہ کمیٹی غٹ قبائلی ایجنسی تا دورہ ءِ کرے و کاروباری شخصیت ، قبائلی سرکڑدہ ، تعلیم یافتہ ورنا، عالم دین و سول سوسائٹی نا باسک آتون اوار دا علاقہ غاتا گچین مروک آ نمائندہ غاتون اوڑدہی کرے تانکہ فاٹا نا آخبت کن سفارشات آتے گڈیکو دروشم تننگ آن مست اوفتا نکتہ نظر ءِ معلوم کننگ مرے۔
کمیٹی غٹ فرنٹیئرز ریجنز آتا سرکڑدہ و ایلو کڑدہ غاتون ہم اوڑدہی کرے۔ دیوان اٹی کمیٹی نا سفارشات آتے (اینو) چارشنبے نا دے نیشنل ایکشن پلان نا وسیع تر کمیٹی نا روبرو پیش کننگ آ اتفاق خننگا۔ دیوان اٹی وزیر کانود زاہد حامد ، گورنر خیبرپختونخوااقبال ظفر جھگڑا، قومی سلامتی نا سلاہکار ناصر خان جنجوعہ ، ڈی جی آئی ایس آئی لیفٹیننٹ جنرل رضوان اختر ، وزیراعظم نا سیکرٹری فواد حسن فواد و سیکرٹری سیفران محمد شہزاد ارباب ئسک ہم ساڑی ئسر۔
