وزیراعظم محمد نواز شریف نا سیالکوٹ ۔ لاہور موٹروے ڈٹ انا بنداو ءِ تخنگ نا دود انا وخت آ لس جلسہ آن تران

وزیراعظم محمد نواز شریف نا سیالکوٹ ۔ لاہور موٹروے ڈٹ انا بنداو ءِ تخنگ نا دود انا وخت آ لس جلسہ آن تران

سیالکوٹ(پاکستان نیوز پوائنٹ 22اگست 2016ء) ) وزیراعظم محمدنواز شریف پارینے کہ نن پاکستان نا شون و شونہالی نا تحریک ءِ چلیفنگ اُن، مخالفین آتا تحریک پھسات ، بدامنی و شون مخالف ءِ ، پاکستان آن تہاری تے چٹفنہ، شونہالی و روشنائی تے مون آ دینہ۔ دوشنبے آ داڑے سیالکوٹ ۔ لاہور موٹروے ڈٹ انا بنداو ءِ تخنگ نا دود انا وخت آ عظیم الشان لس جلسہ آن تران کرسا اوپارے کہ موٹروے ڈٹ سیالکوٹ نا الس کن ٹیکی اسے ہرا شون نا پیش خیمہ مریک، ننا کنٹینر شون و شونہالی نا کنٹینر ءِ ، نن ملک انا روڈ آتے جوڑ کننگ اُن ، گڑاس بندغ روڈآتیا بننگ ءُ، پاکستانی ورناک شو ن و شونہالی خوارہ ، مخالفینک ننا شونداری کاریم تیان خوش افس، الس شون نا خاطر پھسات ءِ مسترد کیر۔

بروک آ اِرا سال اٹی شونداری کاریم تاریخ نا روشن باب مریرہ ، فوج ، پولیس و سیکورٹی ادارہ غاتے سلام پیش کینہ ، دہشت گردی ءِ ہمیش کن چٹفنہ، چین نا کمک آن راہداری ڈٹ زوت پورو مریک، نن خراب حال ریلوے و پی آئی اے ءِ سہی کرینن ، پی آئی اے نا پریمیئر سروس سیالکوٹ آن ہم شروع مریک ، سیالکوٹ آن لاہور مسہ گھنٹہ نا سفر 50 منٹ اٹی مریک ، موٹروے سیالکوٹ آن کھاریاں آ ہم کاہک۔

اوپارے کہ سیالکوٹ نا تاریخ اٹی اینو منفرد ءُ دے اسے کہ داڑے موٹروے ڈٹ انا بنداو ءِ تخنگ انگ ءِ ہراڑآن سیالکوٹ مچ آ ملک اتون منسلک مریک ، سیالکوٹ آن پسرور اسکان ہم روڈ جوڑ کننگک ، ہرحال اٹی ڈسکہ پسرور روڈ جوڑ کینہ، اوپارے کہ الس نا جوزہ ءِ خنسا کنٹینر آ لگوک آ ک تولرہ۔ اوپارے کہ گڑاس بندغ خواپسہ کہ پاکستان آن نیزگاری نا خاتمہ مرے و شونہالی برے، 2013ء ٹی ہر کنڈا برانز ئس ، داسا ہر کنڈآ شونہالی مننگ ءِ، 2018 ء اسکان لوڈشیڈنگ نا خاتمہ مریک، نن مچ آ ملک اٹی موٹرویز جوڑ کننگ اُن، خنجراب آن کراچی اسکان روڈ آک جوڑ مریرہ ۔

وزیراعظم پارے کہ موٹروے ڈٹ سیالکوٹ نا الس کن ٹیکی اسے، ای پارت کرینٹ کہ دا ڈٹ ءِ اِراسال آن کم مدت اٹی پورو کننگے۔ اوپارے کہ سیالکوٹ شاہین و اقبال نا شار ءِ ، کنے سیالکوٹ نا الس تون است اٹ پیار ءِ ، نن پین وخت اس ہم داجاگہ نا خلقت آتے شون نا پین ٹیکی ایتنہ۔ وزیراعظم پارے کہ دا گچین ءُ موٹروے اس جوڑ مریک ۔ وزیراعظم پارے کہ 1999ء ٹی اگہ ننا حکومت چٹفنگ توکہ تو مچ آ ملک اٹی موٹرویز جوڑ مسکہ ، نن دا ڈٹ آتیا دُوارہ ترندی اٹ کاریم نا بناءِ کرینن، فیصل آباد آن ملتان کن موٹروے ڈٹ آ کاریم مننگ ءِ، سکھر آن حیدر آباد و کراچی اسکان موٹروے جوڑ مریک، نن خنجراب آن کراچی اسکان سڑک آتا جال اس شاغنہ۔

اوپارے کہ اینو شونہالی ننا درگہ غا دستک تننگ ءِ ، دہشت گردی آخریکو دم تے ہلنگ ءِ ، نن تینا فوجی افسر و ورناو پولیس نا افسر ، ورنا، سیکورٹی ادارہ و الس ءِ سلام پیش کینہ ہراک دلیری اتون جنگ کریر۔ اوپارے کہ مچ آ ملک اٹی بجلی نا کارخانہ لگنگ ءِ ، ساہیوال ، قصور، تھر، کراچی ٹی پاور پلانٹس اڈ تننگ انگ ءِ ، کولا و گیس آن بجلی نا ڈٹ خلنگ انگ ءِ ، تہو آن بجلی ودی کننگ نا ڈٹ اڈتننگ انگ ءِ ۔

اوتوانائی نا ڈٹ آتا پوروی آ چین اتون اظہار تشکر کرے۔ اوپارے کہ الس نا شون و شونہالی کنا فرض ءِ ہراڑکن نن زیات آن زیات کاریم کینہ۔ وزیراعظم پارے کہ موٹروے آن سیالکوٹ نا تقدیر بدلینگک ہرا پاکستان نا گچین شار جوڑ مریک۔ وزیراعظم پارے کہ پاکستان نا ورناک ملک انا شون و شونہالی ءِ خوارہ ، دا فیصلہ ءِ الس ءِ کروئی ءِ کہ اوفتے سوگوی درکار ءِ یا بدامنی ، امن درکار ءِ پھسات ، معاشی سرگرمی درکار ءِ یا برانز، ہراڑآ جلسہ گاہ ٹی ساڑی الس پبی ورندی ترسا پارے کہ ننے سوگوی، امن و معاشی سرگرمی درکار ءِ ۔

وزیراعظم پارے کہ کالاشاہ کاکو آن پوسکن ءُ روڈ جوڑ مریک ہرادے لنک روڈ اتون ملفنگک۔ اوپارے کہ سیالکوٹ اٹی اورنج لین ٹرین و میٹروبس سروس نا ہم بناءِ کننگک، سیالکوٹ آن سمبڑ یال اسکان ہم پوسکن ءُ سڑک جوڑ کننگک۔