اسلام آباد(پاکستان نیوز پوائنٹ 22اگست 2016ء) پنی جاچکار بریگیڈیئر (ر) سعد نذیر پارینے کہ پاکستان و اوغانستان ءِ مہاجر آتا پدی ہِننگ کن مربوط پالیسی اس مرتب کننگ نا گرج ءِ۔ نجی ٹیلی ویژن تون ہیت وگپ کرسا اوپارے کہ پاکستان کیہی علاقہ غاتیٹی ساڑی اوغان مہاجر آتے وطن آ پدی گدریفنگ کن ہڑتوم آ ملک آتے اواری اٹ تولسا مربوط پالیسی اس مرتب کروئی مرے۔
اوپارے کہ دا ویل تین پہ تینی افہام و تفہیم آن ہی ایسر کننگ مریک۔ اوپارے کہ حکومت پاکستان ءِ رجسٹرڈ و غیر رجسٹرڈ اوغان مہاجر آتا وطن آ پدی ہِننگ نا عمل ءِ سرسہبی اتون پورو کننگ کن مرے کہ پالیسی ءِ زوت آن زوت اس مرتب کننگے و دا بابت اوغان حکومت ءِ ہم مذاکرات اٹی اوار کننگے تانکہ اوغان مہاجر آتا پرامن و باعزت وطن آ پدی ہِننگ نا کسر ءِ ہموار کننگ مرے۔
بریگیڈیئر (ر) سعد نذیر پارے کہ دابابت مسکوہی ٹی کروک آ پڑو آتیا ہم نظرثانی کننگ نا گرج ءِ تانکہ ہڑتوم آ ملک آتا نیام اٹ پین خوشگوار تعلقداری اڈ ہلنگ کے۔ داوخت آ پنی جاچکار ذوالفقار علی پارے کہ اوغان مہاجر آک مسکوہی چار دہائی آن پاکستان اٹی ساڑی ءُ و اوفک داڑے کیہی کاروبار تا بناءِ کرینو ہنداخاطران اوفتا اناگت وطن آ پدی ہِننگ آن اوفتے معاشی نسخان رسینگ انگ مریک۔ اوپارے کہ مہاجر آتا مرحلہ وار پدی ہِننگ نا پالیسی اس مرتب کننگ مناسب مریک۔
